"AMANAT" партиясы Байқоңыр филиалының қолдауымен "QAISAR" әскери-патриоттық партиялық жобасы аясында жасөспірімдер арасында бокстан республикалық турнир басталды.

Спорттық жарысқа Шымкент қаласы, Ақтөбе, Түркістан, Қызылорда облыстары мен Байқоңыр қаласынан 300-ге жуық қатысушы жиналды.

Жарыстың ашылу салтанатына келген Қызылорда облысы әкімінің орынбасары, ҚР Президентінің "Байқоңыр" кешеніндегі арнаулы өкілі Қайрат Нұртай жас боксшыларға сәттілік тілеп, ыстық лебізін білдірді.

Бокс додасына арнайы шақырылған халықаралық дәрежедегі спорт шебері, "Astana Arlans" команда құрамында бокстан әлем чемпионы Бағдат Әлімбеков жарысқа қатысушы спортшыларды жігерлендірді.

Турнирдің мақсаты салауатты өмір салтын қалыптастыру, жастардың бойында туған жерге деген сүйіспеншілікті арттыру, жасөспірімдер арасында олимпиадалық спорт түрін насихаттау, балалардың достық қарым-қатынастарын және спортқа қызығушылығын арттыру.

Байрақты бәсеке 28 сәуірге дейін жалғасады. Жарыс жеңімпаздары арнайы кубок, медаль мен дипломдармен марапатталады.