Халықаралық форумға қатысты

ҚР Мемлекеттік хатшысы Г.Әбдіқалықова Халықаралық форумға қатысты. Нейрохирургия саласының өсіп-өркендеуі мен даму жолындағы айқын мақсаттарын тілге тиек еткен жиынды ашқан ол Президент Нұрсұлтан Назарбаевтың «Төртінші өнеркәсіптік революция жағдайындағы дамудың жаңа мүмкіндіктері» атты жолдауына сәйкес, Қазақстанның Индустрия 4.0, оның ішінде медицина саласы элементтерін енгізуге кіріскенін айтты.
– Президенттің бастамасымен 2008 жылы негізі қаланған Ұлттық нейрохирургия орталығы денсаулық сақтау саласындағы инновациялық жетекші мекемелердің бірі болып саналады. Бүгінде ол Орталық Азиядағы көш бастаушы клиниканың біріне айналды, – деді Г.Әбдіқалықова.
Ұлттық нейрохирургия орталығында 10 жылдың ішінде 37 мыңнан астам адам ем қабылдады, 25 мыңнан аса ота жасалды, 66 нейрохирургиялық жаңа технология енгізілді. Оның базасында Қазақстанда алғаш рет нейрохирургияның жаңа салалары – микронейрохирургия, эндоваскулярлық, эндоскопиялық және функционалдық нейрохирургия енгізілді.