ҮЗДІК ТҮЙЕКЕШ
Сонау нарықтық қатынасқа көшкен жекешелендіру жылдарындажұрт қорасындағы азын-аулақ қой-ешкісінкерек-жарағына айырбастап, малсыз қалғаны рас. Елде мал басының күрт азаюы барша қазақ халқына ауыр тиді. Содан беріде ел үкіметі халықты азық-түлікпен қамтамасыз етуге бағытталған көптеген бағдарлама қабылдап, мал басын өсіруге күш салды. Нәтижесінде сайын даламыз төрт түлік малмен толықты.
Бізде ата кәсіпті қолға алып, түйе өсірумен айналысатын «Қармақшы» жауапкершілігі шектеулі серіктестігі бар. 2003 жылдан бері түйе шаруашылығымен айналысуды қолға алған Қанибай Айтымбетов асыл тұқымды бактриан түйесін өсіреді. Бұл айыр өркешті түйенің таза қандысы. Шаруашылық құрылғалы түлік баптаудың шебері, еңбекке епті азамат Мұсатай Байқазақов отбасымен жұмыс істеп келеді. Мал басының артуы шаруашылық иесінің қажырлы еңбегі, маңдай терінің арқасы десек, М.Телқараұлы биыл барлығы 140 бас түйеден 20 бас бота алып, мал басын 100 проценке сақтаған.
Ата кәсіпті қолға алып, төрт түлікті түлеткен малшылар қауымы Қаратау бөктеріндегі «Үсен бауы» жайлауында бесінші мәрте бас қосты. Бұл жиынға біздің ауданнан да мал өсірумен айналысатын, табысты еңбек етіп жүрген қожалық басшылары қатысты. Заманауи озық технологияны енгізіп, сапалы өнім өндіру, сондай-ақ экспорт әлеуетін арттыру мақсатында өткен мазмұнды жиында жерлесіміз, «Қармақшы» ЖШС түйекеші Мұсатай Телқараұлы «Үздік түйекеш» номинациясы бойынша марапатталды.
Ол алғаш 2014 жылы өткен малшылар слетінде де үздіктер сапынан көрінген еді. Еңбек адамының мұндай құрметке бөленуі – 20 жылдан аса бір шаруашылықта табанды еңбек етуінің нәтижесі. Жары Айжамал Нақыпова сауыншы. Әркез отағасының жанынан табылып, алаңсыз жұмыс істеуіне жағдай жасап келеді.
– Түйе өсіру – Қазақстанда мал шаруашылығының ең тиімді бағытының біріне айналды. Өйткені айыр өркешті түйе климат таңдамай өмір сүруге бейім. Сондай-ақ жайылымды басқа ауыл шаруашылығы малдарына зиянын тигізбей жыл бойы пайдалана алады. Біз отырған жерде су да, жарық та бар. Шаруашылық басшысы Қанибай Айтымбетов бар жағдайды жасаған. Қыс қыстауда, жаз жайлаудамыз. Бала кезден түйе өсірудің қыр-сырын көріп өскен ұлдарымыз жанымыздан табылып, қолғабыс етіп жүр. Аптасына 3 мәрте аудан орталығына шұбат жеткіземіз. Қай салада жүрсең де, қандай еңбек етсең де еленгенің жақсы ғой. Екінші мәрте «Үздік түйекеш» номинациясын алдым. Бұл отбасымның жемісі, – дейді марапат иесі.
Төрт түліктің ішінде түйе малын байлық, көлік, азық ретінде қатты қастерлейміз. Шұбаты шипа түлік төресі – түйе өсірген жан табыссыз болмайды.
Гүлжанат ДҮЗЕНОВА
