СЫРДА ТУҒАН СЫРБАЗ АҚЫН
ІІІ Интернационал онлайн орталығының кітапханашысы, «Кітапхана ісінің үздігі» төсбелгісінің иегері Рима Тұрманова «Рухани жаңғыру» тұғырнамасы және республикалық «Бір ел – бір кітап – 2019» атты акция аясында аудандық кітапхананың «COWORKING» орталығында «Сырда туған сырбаз ақын» атты әдеби-сазды кеш өткізді.
Қазақ әдебиетінде ойып алар орны бар ақынның өмір жолы мен шығармалары, сыни зерттеу, естеліктері көпшілікке жақсы таныс деуге болады. Ә.Тәжібаевтың шығармалары биыл республикалық акция аясында жалпыхалықтық оқуға ұсынылды. Әдеби сазды кеште оның жауһар жырлары оқылды. Ақынның сөзіне жазылған әндер орындалды, «Жалғыз ағаш орман емес» пьесасынан көрініс қойылды. Кешке қатысқан аудан әкімінің кеңесшісі Д.Нәзікбаев, аудандық маслихат депутаты К.Раева, саламатты өмір салтын қалыптастыру кабинетінің меңгерушісі Ү.Тұрмағанбетова тағылымды іс-шара жайлы жақсы пікір білдірді. Бұл шараның ерекшелігі – онлайн режимде өтуі. Оған Ә.Тәжібаев атындағы облыстық кітапхананың әдіскері С.Оспанова және Мәдениет онлайн орталығының үйлестірушісі Г.Ділдабековалар да қатысып, ойларын ортаға салды. Әдеби сазды подиумды кітапхана директоры қорытындылап, қатынасушыларға алғыс хат пен естелік сыйлықтар табыс етті. Көрермендер интернационалдық жастардың талантына, өнеріне тәнті болды. «Сырдария» әнін барлығы қоса шырқап, көңілді тарқасты.
Гүлжанат ӘМІРҚЫЗЫ,
«Қармақшы таңы».
