"Қауіпсіз тағам таңда!" акциясы Қармақшы ауданы Жосалы кентіндегі "Таңсықбай" базарында жалғасты. Аудандық қоғамдық денсаулық сақтау басқармасы және «Ұлттық сараптама орталығы» Қызылорда облысы бойынша филиалының Қармақшы аудандық бөлімшесі мамандары тағам өнімдерінің пайдалану мерзімі туралы, тағам өнімдерінің таңбалануы, өнімдердің сақталу жағдайлары, тез бұзылатын өнімдер туралы, тамақпен уланудың алдын алу туралы түсіндіру жұмыстарын жүргізді.

Акцияға тұтынушылар қызығушылық танытып, құлпынай, жүзім, қызанақ, қияр, алма өнімдерін нитратқа тексеруге ұсынды. Нәтижесінде жүзім өнімінен сәйкессіздік анықталды. Қалыпты мөлшер 60 болуы тиіс болса, ол нормадан асып 68-ді көрсетті.

Бактериологиялық зерттеуге 2 түрлі шұжық (колбаса), 2 түрлі сары май, пряник, бәліш өнімдері экспресс әдіспен тексеріліп, нәтижесінде бәліштің микробтық ластануы жоғары екендігі анықталды. Бәлішті сатушыға өнімді сатылымнан алып тастау керектігі жөнінде түсіндірілді.