Шара шымылдығы оқырмандарға ауыл өнері мен мәдениетінің, тарих пен әдебиеттің жанашыры Сақтапберген Қосбаевтың өмір жолы мен шығармашылығын таныстырумен басталды. Жиында тақырыпқа сай көрме ұйымдастырылып, онда ақынның кітаптары, археологиялық қазба жұмыстары және өз қолынан шыққан бұйымдары қатысушылар назарына ұсынылды.

Кеште сегіз қырлы бір сырлы С.Қосбаев түрлі аспапта ойнайтынын аңғардық. «Ассалау­мағалейкум» атты ән-жырды оқырман қауым сүйсіне тыңдады. Тіпті бұл аспапты ара-тұра ағайдың өзі де қолмен жасайтын өнері бар екен.

Сақтапберген Төлегенұлы қаламгер, тарихшы, мәдени мұра жанашыры, зерттеуші, ұста, өнерпаз, сценарист, ұстаз, ауданның үздік ғылыми жетек­шісі, «Білім беру ісінің майталманы» медалінің иегері, «Шығармашыл ұстаз» төсбелгісінің иегері, ақын. Сан-салалы Сақтапберген Қосбаевтың осыған дейін 3 кітабы жарық көрген. Әр кітаптың шығуының өзіндік қызық оқиғалары бар екен.

– Кітап шығарамын деп еш ойлаған емеспін. Өлең жазатын қабілетім бар-ды. Облыстық «Сыр бойы» газетіне бірді-екілі өлеңімді жарияламаққа алып барғанмын. Сонда газеттің қызметкері Дүй­сен­бек Аяшұлы «тағы өлеңіңіз бар ма?» – деп сұ­рады. Содан әр жерде жазған өлеңдерімді топтас­тырып кітап етіп шығардық, – дейді шығармашыл тұлға.

Кеш соңында Сақтапберген Төлегенұлының әріптес достары, сыныптастары, қатысушы қо­нақтар сөз сөйлеп, жылы лебізін білдірді.