ТАЛАПТЫҢ МІНІП ТҰЛПАРЫН...
«Жастар – қоғамның қозғаушы күші» деп Елбасы айтқандай, елімізде, оның ішінде Қармақшы ауданында өңір халқының тұрмыс-тіршілігін нығайтуға белсене атсалысып жүрген жастар жетерлік.
Солардың қатарында жас та болса дарындылығымен, ізденімпаздығымен, еңбексүйгіштігімен танылып жүрген жүрген №279 орта мектептің жас мұғалім Гүлдана Қосжанова да бар.
Ал, енді осындай мәртебелі мамандықтың иесі жайлы айтар болсақ, ғарышкерлер астанасы Байқоңыр қаласында өмірге келген Гүлдана Салмаханқызы өзге замандастары сияқты қаладағы мектепте білім алды. Онжылдықты тәмамдаған соң, жүрек қалауымен Махамбет Өтемісұлы атындағы Батыс – Қазақстан мемлекеттік университетінде ағылшын және француз тілі мамандығы бойынша төрт жыл ұлағатты ұстаздардан тәлім алады.
«Туған жердің түтіні де ыстық» деген тәмсіл бар қазақ даналығында.
Міне, осы ұстанымды бойына сіңірген жас маман елге оралғаннан кейін Ақай ауылындағы №279 орта мектепке ағылшын тілі маманы болып қабылданады. Ал жыл өте Елбасының жастар саясатын қолдауға арнаған мемлекеттік бағдарламаларының бірі, нақтысын айтқанда жоғары білімді жастарды елді мекендерге тарту, оларды ауылдардың әлеуетін арттыруға белсенділік таныту мақсатында өміршең болған «Дипломмен ауылға» бағдарламасына қатысып, тұрғын үй сатып алады.
Әлемдегі ең ұлық та мәртебелі мамандықтың бірі де бірегейі саналатын ұстаздықты өміріне серік етуге бел буған жас маман бүгінде өзінің білімі мен тәжірибесін шәкірттерінің бойына дарытуда белсенділік танытып келеді. Тіпті, мектепте өткізілетін қоғамдық жұмыстардың алғы шебінен көрініп жүр десек артық айтқандық емес. Оған айғақ, Гүлдана жуырда Елбасының «Болашаққа бағдар: рухани жаңғыру» бағдарламалық мақаласын жастар арасында кеңінен насихаттау мақсатында жас мамандардан құрылған «Руханият» үгіт-насихат тобы құрамында үздік өнерімен ауданнан оза шауып, облыстық кезеңнен бас жүлдеге ие болды.
– «Ұстаздық еткен жалықпас, үйретуден балаға» деп ұлт данышпаны Абай Құнанбаев айтқандай, адамзат баласы үшін ең ұлық та мәртебелі мамандық саналатын мұғалімдікті таңдағаныма қуанамын. Бүгінде мектепте, жоғары оқу орнында оқып жүріп, санама сіңірген білімімді шәкірттеріме жеткізуде аянбай еңбек етудемін. Өзімді толыққанды білім саласының маманы санаймын. Осындай мәртебелі мамандық иесі атану үшін міндетті түрде оның қыр-сырын тереңдете меңгеру керек. Міне, алдағы уақытта өзімнен кейінгі өскелең ұрпақтың білімді де бәсекеге қабілетті ұрпақ болып қалыптасуына, қоғамның құрметті азаматы болып өсуіне тер төге еңбек етуге тиіспін. Бұл менің азаматтық парызым, – дейді Гүлдана.
Нұрбай ЖАНӘДІЛОВ,
Байқоңыр қаласы.
