Жуырда Қармақшы ауданы әкімдігінің ұйымдастыруымен Байқоңыр қаласында 1-мамыр Қазақстан халқының бірлігі күні мерекесіне орай ауылшаруашылығы тауарлары жәрмеңкесі өтті.

Жәрмеңкеде қармақшылық ди­қандар мен кәсіпкерлер қала тұрғындарына арнап, күріштің «Лидер» сортын, күріш жармағы мен картоп және сәбіз, қырыққабат пен асқабақ, сонымен бірге нан және кондитерлік өнімдермен бірге жеміс-жидек, басқа да ауылшаруашылығы тауарлары өнімдерін базар бағасынан арзанға сатып, алғысқа бөленді. Сонымен бірге, Қызылорда қаласындағы «Алтын қамба» акционерлік қоғамы картоп пен қарақұмық, ұн және қантты нарықтан арзанға ұсынды.

– Байқоңырлықтардың ме­ре­­ке­лік дастарқан мәзірін ауыл­шаруашылығы тауарлары өнім­дерімен толықтыруда үлесін қо­суға келген қармақшылықтар күріштің келісін 200 теңгеден, асқабақтың келісін 200 теңгеден, күріш жармағынның қабын 1000 теңгеден, картоптың келісін 40 теңгеден сатты. Әсіресе, қалалықтар алтынқамбалықтар әкелген 7 тонна картопқа кезекке тұрып, оның сапасына да, бағасына да риза болды. Жәрмеңкеде барлығы 8 тонна картоп, 4 тонна Сыр маржанының «Лидер» сорты, 200 келі асқабақ және басқа да ауылшаруашылығы өнімдері сатылды, – деді бізге берген мәліметінде аудандық ауылшаруашылығы бөлімінің сек­­­тор меңгерушісі Жағыпар Төлегенов.

– Соңғы жылдары Бай­қоңыр қаласы тұрғындары ауыл­ша­руашылығы тауарлары өнім­де­рінен қат болған емес. Мына жағы қармақшылық диқандардың өндір­ген күріш, картоп, қауын-қарбыз, бергі беті Қазалы мен Арал аудандары кәсіпкерлері өндірген егін және мал, сонымен бірге балық, сүт, нан, кондитерлік өнім­дермен қамтамасыз етілді. Бәрі де базар бағасынан едәуір арзан сатылуда. Айына бір-екі рет ұйымдастырылатын жәрмеңкені қалалықтар асыға күтеді. Міне, бүгін де отанамызбен бірге қар­мақшылықтар ұйымдастырған жәр­­меңкеден картоп, сәбіз сатып алып тұрмын. Осындай игі шараны ұйымдастырушыларға өз отбасымның атынан айтар алғысым шексіз, – дейді қала тұрғыны Игенбай Төлегенов.

Иә, сол күні байқоңырлықтарға қармақшылық диқандар мен кәсіпкерлер 10 автокөлікке тиелген ауылшаруашылық тауарлары өнімдерін сатып, ел ризығына бөленді.