МҮШЕЛІККЕ ҚАБЫЛДАДЫ
Жақында «Нұр Отан» партиясының 20 жылдығына орай өткен актив отырысында ҚР Президентінің «Байқоңыр» кешіндегі арнаулы өкілінің қызметін қамтамасыз ету басқармасының басшысы Жасұлан Абатов шараға қатысушыларды айтулы мерекемен құттықтап, ыстық ықыласын білдірді.
Сондай-ақ, Ж.Абатаов Байқоңыр өңірі әлеуетін арттыруға сүбелі үлесін қосып келе жатқан бір топ азаматтарға облыс әкімінің Алғыс хатын тапсырды.
Сонымен бірге, шара аясында «Нұр Отан» партиясы Байқоңыр филиалы төрағасының бірінші орныбасары Бақытбек Бекпанов партияның 20 жылдығына байланысты бір топ жас маманға партиялық билет табыстады.
Жиын соңында Байқоңыр қалалық Ардагерлер кеңесінің төрағасы Т.Альмаханов партияға жаңадан қабылданған жастарға партияның алға қойған міндеттерін жүзеге асыруда тынбай еңбек етіп, ел экономикасы мен халық әлеуетін арттыруға аянбай жұмыс істеуге шақырды.
