АНАЛАРҒА ҚҰРМЕТ КӨРСЕТІЛДІ

Өңірде Аналар мерекесі қарсаңында көптеген шара ұйымдастырылды. Соның бірі – «Нұр Отан» партиясы аудандық филиалында «Кедергісіз келешек» жобасы аясында өтті.

Мерекелік шарада «Нұр Отан» пар­тиясының аудандық филиал төра­ға­сының бірінші орынбасары Дастан Буханов ауданның мүмкіндігі шектеулі балаларды тәрбиелеп отырған 10 анаға құрмет көрсетті. Сондай-ақ, ол еліміздегі әлеуметтік мәселелердің Елбасы назарында екенін және айтулы партияның келешекте  атқаратын жұмыстары жөнін­де кеңінен әңгімеледі.

Қабылдауға келгендер қатарында Жосалы кентінің тұрғыны, 5 баланың анасы Роза Камалбекқызы да бар. Бір атап айтарлығы, көпбалалы ананың туған күні де 8-наурыз мерекесімен тұспа-тұс келеді екен.

– Ертең туған күнім. Алла қаласа, 27 жасқа толамын. Бала кезімнен сәбилерді жақсы көретінмін. Тілегім қабыл болып, бүгінде 5 баланың анасы атандым. 18 жасымда Қабыл есімді жігітке тұрмысқа шықтым. Бала – Алланың сыйы. Көзге көрінгендерді аман-есен өсіріп-жеткізсек деген ұлы арман бар. Аналар мерекесінде осындай құрмет көрсетіп жатқан «Нұр Отан» партиясының ау­дандық филиалына алғысымды біл­діремін, – дейді жас ана.    

Шарада аялы алақаны бесігімен қоса, әлемді тербеткен аналар жүзінен мейірім шуағы есті. Мереке соңында аналар естелік суретке түсті.

Сәрсенкүл АҚКІСІ,

«Қармақшы таңы».