БУЫН АУРУЫ БЕЛЕҢ АЛУДА
Халық «ауру айтып келмейді», – деп бекерге айтпайды. Аурудың басым көпшілігін адамдар өз салғырттығынан, еріншектегінен, жауапсыздығынан табады. Жас кезімде тапқан бел ауруы, яғни медициналық терминмен айтқанда, острехондроз мені көп мазалайды. Өткен жылдың соңғы күндерінде сол ауруым қайта қозып, төсекке таңылдым. Ауырғаны соншалықты ол аяққа шапты. Тіпті, таяқ та ұстап қалдым. Біреулер «грыжа», енді біреулер тамырға суық тиген деді. Содан дәрігерге көрініп, маманның берген нұсқауымен ем алдым. Қазақы емдерді де қолдандым. Спортпен шұғылдандым. Бас-аяғы жиырма күн ішінде жүріп кеттім.
«Қасқырдың азығы жолда» дегендей, журналистке де мақала жазуда бір нәрсе сеп болатыны рас. Буын ауруына шалдыққан тек мен ғана емес, біршама адам бар екен. Олар жолыққан сайын «қалай жазылдың? Нендей ем қабылдадың? Не істеуге болады?» деген сауалдарды қояды. Бұл сауалдарға әрине, маман жауабы дайын.
– Жалпы буын ауруымен ауыратындар елімізде, оның ішінде Қармақшы өңірінде жетерлік. Мәселен, осы остеортроз, яғни мойын, бел, тізе буын ауруы. Аталмыш ауруға көбіне 50 жастан асқан ерлер мен 40-тан асқан әйелдер шалдығады. Әйелдер демекші, олар үй тірлігінде жүргенде көп бүгіліп, ауыр көтереді. Бұл кейін буын ауруына әкеледі. Қазіргі таңда, жастар арасында да осы ауруға душар болғандар кездесуде. Өйткені, олар таңның атысы, түннің батысы, тіпті азанға дейін компьютерге шұқшиып отырады. Жастар арасында әсіресе мойын буыны, бел буыны ауруына тап болғандар көп. Жоғарыда айтқандай, жалпы буын паталогиясында деформациялық остреоартроз 60-80 проценті құрайды. Адам жасының ұлғаюына байланысты аурудың көрсеткіші де көбейеді. Оның ішінде, 50 жастан асқан адамның 27 проценті 65-тен асқан адамның 97 проценті осы аурумен ауырады.
аурудың пайда болуына не себеп? Остеоартроздың негізгі белгілері шеміршектің біріншілік дегенерациялық өзгеріске ұшырауы, буындағы сүйекқаптың жұқаруы, талшықтардың ыдырауы, сонымен бірге сүйек өзгерістері мен буын беттерінің конгруэнтінің бұзылуына байланысты. Ауруға себепші адамның салқын күндері жеңіл киініп жүруі, араққа сылқия тойып, аязда қалып қоюы, ауыр көтеруі. Аурудың екінші бір түрі – остреохондроз ауруымен ауырғандар түшкіргенде, жөтелгенде оқыс қимылдағанда қатты сезіледі. Бұл екі ауру түрлі инструментальді зерттеу, нақты айтқанда рентгенография, артроскопия, ультрасонография, компьтерлік томография, сцинтриграфиялық құрылғылар арқылы анықталады. Буын ауырса дереу дәрігерге қаралу керек, – дейді амбулаториялық-емханалық қызметі бар аудандық емхананың жалпы тәжірибелік дәрігері Айдос Жанәлиев.
Кім ауырғанды жақсы көреді дейсіз? Десе де, айтып келмейтін аурудан алдын ала сақтанған адам ғана сау жүреді. Сондықтан «Ауырып ем іздегенше, ауырмайтын жол ізде» деп дана халқымыз айтқандай, сырқаттың алдын алу өзіміздің қолымызда. Денсаулық – ұзақ өмір кепілі.
Нұрбай ЖАНӘДІЛОВ,
«Қармақшы таңы».
