ШЕБЕРДІҢ ҚОЛЫ ОРТАҚ
Байқоңыр қаласы С.Жиенқұлов атындағы колледждің тігін тігу факультетінің жас оқытушысы Жанат Жанұзақованың өнегелі ісіне ұжым қызметкерлері аса құрметпен қарайды. 2016 жылы Елбасының жастар саясатын қолдауға арналған мемлекеттік «Жастар тәжірибесі» арқылы колледжде алғашқы еңбек жолын бастаған Жанат көп кешікпей ұжым алдында өз ісінің шебері, білгірі екенін дәлелдеп, өзі тәлім беретін шәкірттерін тігін ісіне баулуда ерекше жетістікке қол жеткізіп келеді.
Аз уақыттың ішінде тігін кабинетін қазақы оюмен өрнектелген ұлттық киімдер мен сәукеле, тақия, сөмке, жүннен тоқылған басқа да ұлттық нақыштағы киім үлгілерімен толтырып қойды. Сонымен бірге, шәкірттерін де осы кәсіпке баулып, олардың сүйікті іспен айналысуына еңбек сіңірді. Бүгінде Назерке Жәли, Бақыт Ақназарова, Ақзер Төлеген, Нәзипа Аралбаева, Айкерім Романова сынды шәкірттері түрлі байқауға қатысып, жүлдегер атанып жүр.
– Тігінші ісіне бала кезден қызығушылық таныттым. Тәрбия есімді апайымның тіккен кестелі орамалдары мен түрлі ою-өрнекпен кестеленген бұйымдарына қызыға қарайтынмын. Тезірек өсіп, тігінші болсам деген арман болды. Балалық арман өсе келе, өміріме серік болар мамандығыма айналды. Осы мақсатқа қол жеткізуде Алматыдағы технологиялық университеттің «жеңіл өнеркәсіп бұйымдарының құрастырылуы және технологиясы» бөліміне қабылдандым. Төрт жыл білікті сала мамандарынан тәлім алып шыққан соң, Әнуарбек Дәуленбаевтай білікті ұстазым басшылық ететін колледжде тәжірибеден өтіп, кейін ұстаздық қызметке тағайындалдым.
Міне, бүгінде сол аға буыннан ұстаздық өнердің қыр-сырын меңгеріп, алған тәлім-тәжірибемді шәкірттеріме үйретудемін. Университетте білім алып жүрген кезімде түрлі байқауға қатысып, авторлық жеке патент те алдым. Ғылыми жоба да қорғап, ҚР Білім және ғылым министрі Е.Сағадиевтің ІІдәрежелі дипломына да ие болдым. Ал, мақсатыма келер болсақ, туған елімнің өсіп-өркендеуіне перзенттік үлесімді қосып, ата-бабалардан аманатқа қалған ұлттық өнер мен салт-дәстүрді өскелең ұрпақ санасына сіңіру. Елбасының ұстанымын ұлтқа ғана емес, әлемге насихаттау, – дейді жас маман Жанат Серікқызы.
– Колледжіміз жас мамандармен толығуда. Әкімшілік тарапынан оларға қолдау көрсету жолға қойылған. Жанат сынды жас дарындарымыз түрлі тәжірибелік курстан өтіп, білімін жетілдіруде. Байқауларға қатысып, жүлделі орындарға да ие болуда. Әрине, биыл елімізде Елбасының қолдауымен «Жастар жылы» болып жарияланды. Мемлекет басшысының ел жастарына деген қолдауын біз құптаймыз, – дейді колледж директорының орынбасары Нұргүл Әлімбаева.
Нұрбай ЖАНӘДІЛОВ,
«Қармақшы таңы».
Пікір 1