АЗАМАТТЫҚ ҚОҒАМДЫ ДАМЫТУДЫҢ ТЕТІГІ

Бүгінде ауданда 52 үкіметтік емес ұйым болса, оның 38-і белсенді жұмыс істеуде. Соның бірі – Ж.Жәкеев төрағалық ететін Жосалы кенті ардагерлер кеңесі.

– Астана қаласы бұрынғыдан да гүлдене түскен. Бір-біріне ұқсамайтын  зәулім ғимараттар көздің жауын алады. Қазақстан азаматтарының өмір сүру сапасын жақсарту, азаматтық жауапкершілігін арттыру мақсатында өткен айтулы шара «Мен сенемін» атты конференциямен шымылдығын түрді. Онда «Қазақстан Азаматтық Альянсы» заңды тұлғалар бірлестігінің президенті Асылбек Қожахметов, Қоғамдық даму министрі Дархан Калетаевтар форумның маңыздылығына тоқталды. Бәрінен де форумның пленарлық отырысына  Мемлекет басшысының қатысуы маған қатты әсер қалдырды. «Соңғы уақытта кәсіпкерлердің қайырымдылыққа көңіл бөлуі қуантады. Қазақстанда жетім балалар үйі болмауы тиіс. Біздің балаларымыз мұхиттың арғы жағындағы елге барып, бізге бөтен болмауы қажет. Бір немесе үш баласы бар адам  тағы бір баланы асырап алса, ол тек қана жақсылыққа ие болады деп сенемін», – деді Елбасы. Бұл – еліміздегі үлкен мәселенің бірі. Қазақ халқы ешқашан жетімі мен жесірін жылатпаған. Президенттің мұндай ұсыныс білдіруі – оның кемеңгерлігі. Бұл ұсынысты Қазақстан халқы қолдайтынына күмәнім жоқ. Қуанарлығы – форумда бірнеше әлеуметтік жоба жеңімпаз атанса, олардың қатарында Сыр елінің екі бірдей үкіметтік емес ұйымы «Дені сау ұлт – гүлденген Қазақстан» номинациясын қанжығасына байлады, – дейді Жақсыбай Малбағарұлы.   

    

Азаматтық қоғамды дамыту – бүгінгі күннің өзекті мәселесі. Бұл тұрғыда Елбасы үкіметтік емес ұйымдарға жан-жақты қолдау білдіріп, өркенді іске кәсіпкерлердің  бір жеңнен қол, бір жаға­дан бас шығаруға атсалысу керектігін атап өтті.