Есірткісіз болашақ – саналы ұрпақтың таңдауы

         Болашақ – бүгінгі ұрпақтың қолында. Ал сол болашақтың қандай болатыны әрқайсымыздың бүгінгі таңдауымызға байланысты. Қазіргі қоғамды алаңдатып отырған өзекті мәселелердің бірі – есірткіге тәуелділік. Бұл тек бір адамның тағдырына әсер ететін мәселе емес, тұтас қоғамның дамуына кедергі келтіретін қауіпті құбылыс.
        «Бірінші байлық – денсаулық» деп бекер айтылмаған. Адамға берілген ең қымбат қазына – өмірі мен денсаулығы. Алайда кейбір жастар қызығушылықтың жетегінде кетіп, бір сәттік әуестіктің салдары қандай болатынын ескере бермейді. Есірткі адамды арманына жақындатпайды, керісінше, мақсатына жетуіне тосқауыл болады. Ол адамның денсаулығына зиян келтіріп қана қоймай, жақындарымен қарым-қатынасына, біліміне және болашағына да кері әсер етеді.
        Менің ойымша, есірткімен күрес тек құқық қорғау органдарының міндеті болмауы керек. Бұл – отбасының, мектептің және әрбір азаматтың ортақ жауапкершілігі. Жастар бос уақытын тиімді пайдаланып, спортпен, өнермен, біліммен айналысуы қажет. Өйткені «Жақсыдан үйрен, жаманнан жирен». Сонымен қатар әр адам өз ортасын дұрыс таңдап, күмәнді ұсыныстарға батыл түрде «жоқ» дей білуі керек. Нағыз ерлік – өз өміріңе жауапкершілікпен қарау.
       Біз – еліміздің ертеңіміз. Ендеше, есірткісіз қоғам қалыптастыру әрқайсымыздың азаматтық борышымыз. Есірткісіз өмір – шектеу емес, еркіндік пен бақытқа бастайтын саналы таңдау!

 Сәлима КӘРІБАЙ,

№28 орта мектебінің 11 сынып оқушысы