ӨРТСІЗ ОРТА - ҚАУІПСІЗ ӨМІР
Күнделікті тұрмыста жиналатын қоқыстың дұрыс жиналмауы немесе бей-берекет жағылуы қоршаған ортаға ғана емес, адам өміріне де үлкен қауіп төндіруде. Әсіресе жаз мезгіліне қарсы ауа райының құрғақ әрі ыстық болуы өрттің тез таралуына себеп болады. Сондықтан қоқыс өртінің алдын алу – әрбір азаматтың міндеті.
Ең алдымен, қоқысты арнайы белгіленген орындарға ғана тастау қажет. Көп жағдайда адамдар қоқысты кез келген жерге төгіп, оны өртеу арқылы тазартқысы келеді. Алайда мұндай әрекет бақылаусыз қалып, өрттің үлкен аумаққа таралуына әкелуі мүмкін. Әсіресе құрғақ шөп, қағаз, пластик сияқты тез жанатын қалдықтар өрттің қауіптілігін арттырады.
Пластик, резеңке және басқа да синтетикалық заттар жанғанда адам денсаулығына зиянды газдар бөлінеді. Бұл тек өрт қаупін ғана емес, экологиялық мәселелерді де туындатады.
Қоқыс өртінің алдын алу үшін жергілікті билік пен тұрғындар бірлесе әрекет етуі тиіс. Арнайы контейнерлердің жеткілікті болуы, қоқысты уақытылы шығару, сондай-ақ халық арасында түсіндіру жұмыстарын жүргізу – маңызды шаралардың бірі.
Сондықтан әр адам қарапайым ережелерді сақтап, өрт қауіпсіздігінің алдын алу маңызды.
Аудандық төтенше жағдайлар бөлімі
