Конституцияға 30 жыл – Әділдік пен бірліктің берік тұғыры

Биыл Қазақстан Республикасының Конституциясына 30 жыл толып отыр. Бұл мерейтой – еліміздің тәуелсіздік жылдарындағы ең маңызды тарихи белестердің бірі. Конституция – мемлекеттіліктің нышаны ғана емес, қоғамдық тұрақтылық пен құқықтық тәртіптің негізі.

1995 жылғы 30 тамызда бүкілхалықтық референдум арқылы қабылданған Конституция тәуелсіз Қазақстанның даму бағытын айқындап, жаңа дәуірдің құқықтық тұғырын қалады. Онда мемлекетіміздің басты құндылығы ретінде адам мен оның өмірі, құқықтары мен бостандықтары белгіленді.

Осы 30 жыл ішінде Ата Заң қоғамның өзгерістеріне сай жетілдіріліп, заман талабына бейімделіп келеді. Соңғы конституциялық реформалар «Әділетті Қазақстан» идеясының өзегін нақтылап, билік тармақтарының теңгерімін нығайтты, азаматтардың мемлекетті басқаруға қатысу мүмкіндігін кеңейтті.

Конституция сот жүйесі үшін де ерекше маңызға ие. Ол сот билігінің тәуелсіздігін, судьяның мәртебесін және әділ сот төрелігінің қағидаттарын айқындайды. Әрбір сот шешімі – Конституциядан бастау алып, азаматтардың құқықтары мен бостандықтарын қорғауға бағытталған.

30 жылдық мерейтой – бұл тек өткен жолға көз жүгірту ғана емес, елдің құқықтық мәдениетін арттыруға, әділдік пен заң үстемдігіне деген сенімді нығайтуға арналған кезең.