ҰЛТТЫҚ ҺӘМ РУХАНИ ҚҰНДЫЛЫҚТАРДЫ ЖАҢҒЫРТУДЫҢ ЕРЕКШЕ МҮМКІНДІГІ

Ислам діні отбасы институтын ерекше бағалап, оның тұтастығы мен тыныштығын басты орынға қояды. Қасиетті Құранда маңызды аят бар: «Сендер бір-бірлеріңмен тыныштықта өмір сүрулерің үшін жұбайларыңды жараттық. Араларыңа сүйіспеншілік пен мейірім салдық» дейді. (Рум сүресі, 21-аят). Бұл аят ер мен әйелдің арасындағы некелік байланыс – тек өмірлік серіктестік қана емес, рухани үйлесім мен жүрек жылуы екенін білдіреді.

Ал Пайғамбарымыз «Сендердің ең жақсыларың – отбасына ең жақсы болғандарың» деп отбасындағы ізгілік пен сыйластықты иманның ең жарқын көрінісі ретінде бағалаған.

Отбасы – қоғамды құрайтын, ұлттың іргетасын қалайтын маңызды фрагмент. Оның басты тіректері бірінші, махаббат пен мейірім – жанұяны бір-біріне бауыр басқан жылы ұяға айналдырады. Екінші, жауапкершілік пен әділдік – отағасы мен отанасының өз міндеттерін адал орындауы шаңырақты берік етеді. Үшінші, тәрбие мен өнеге – ата-ана баланы тек материалдық тұрғыда қамтамасыз етіп қоймай, оны иманды, ізгі жүректі етіп тәрбиелеуге міндетті. Төртінші, сабыр мен ынтымақ – қиын сәттерде бірбіріне тірек болу – берекенің кілті.

Бүгінде жаһандану мен заманауи ақпарат ағыны отбасылық құндылықтарға түрлі сынақ әкелуде. Ажырасу деңгейінің өсуі, жастардың некеге жеңіл қарауы, ата-ана мен бала арасындағы байланыстың әлсіреуі – қоғам үшін алаңдатарлық жайт. Мұндай кезеңде Исламдағы отбасы үлгісі – тұрақтылықтың, өзара құрмет пен сүйіспеншіліктің айқын жолы.

«Ислам және отбасы жылы» аясында республика көлемінде имамдар, ұстаздар, қоғамдық ұйымдар мен БАҚ өкілдері бірлесіп, жастарға некенің қасиеті мен жауапкершілігін түсіндіретін, ата-анаға құрмет пен бала тәрбиесіне бағытталған іс-шаралар өткізуде. Біздің негізі қызметіміз де осы бағытта жұмыла жұмыс жасау.

Отбасы – мемлекеттің берік іргетасы. Ал Ислам – сол іргетасты рухани тұрғыдан күшейтетін темірқазық. Егер әр шаңырақта сүйіспеншілік пен сыйластық салтанат құрса, ол елде бірлік пен береке орнайды.

«Ислам және отбасы жылы» – халқымыздың жүрегіне имандылық пен ізгіліктің дәнін себетін, ұрпаққа өнеге қалдыратын игі бастама. Бақытты отбасы – баянды елдің кепілі.