15 мамыр – Халықаралық отбасы күні
15 мамыр – Халықаралық отбасы күніне орай Қызылорда қаласында «Отбасы – бақыт мекені» атты мерекелік шара өтті. Іс-шара отбасылық құндылықтарды насихаттап, ұрпақтар сабақтастығын дәріптеумен қатар қоғамда мейірімділік пен сыйластықты нығайтуға бағытталған.
Отбасы – адам баласы үшін ең қымбат әрі қасиетті ұғым. Ұлтымыздың сан ғасырлық мәдениетінде отбасы – рухани байлықтың, ізгілік пен мейірімнің ордасы, ұлттық тәрбиенің бастау көзі саналады. БҰҰ Бас Ассамблеясының шешімімен 15 мамыр – Халықаралық отбасы күні ретінде бекітілді. Сәйкесінше, әр жыл сайын бұл күн отбасылық құндылықтарды ұлықтауға арналған түрлі іс-шаралармен атап өтіледі.
Салтанатты жиында облыс әкімінің орынбасары Шахмардан Байманов құттықтау сөз сөйлеп, мерейлі мерекемен алтын және маржан той иелерін марапаттады. Сонымен қатар, шара аясында жас отбасылардың неке қию рәсімі орындалды. Мерекелік шараның жалғасы ән-шашу мен көтеріңкі көңіл-күйге жалғасты.
