ӨРТТІҢ АЛДЫН АЛУ – ӘРБІР АЗАМАТТЫҢ МІНДЕТІ

Бүгінгі күні автокөліктердің басым бөлігі газ отынымен жүреді. Бұл – экологиялық жағынан тиімді, әрі үнемді отын түрі. Дегенмен, газ – өте қауіпті, тез тұтанатын және жарылғыш зат болғандықтан, оны пайдалану кезінде барынша мұқият болу қажет. Әсіресе автогаз құю бекеттерінде қауіпсіздік ережелерін сақтау – әрбір жүргізуші мен қызметкердің тікелей міндеті.

НЕЛІКТЕН ӨРТ ҚАУПІ ЖОҒАРЫ?

Автогаз (көбіне пропан-бутан) – қысыммен арнайы баллонда сақталады. Газ құю кезінде немесе тасымалдау кезінде сәл ғана ақау болса, газ ауаға таралып, от ұшқынымен жарылып кетуі мүмкін. Бұл адам өміріне, көлік пен ғимараттарға үлкен қауіп төндіреді. Сондықтан әрбір газ құю бекетінде арнайы өрт қауіпсіздігі ережелері сақталуы тиіс.

ҚАУІПСІЗДІК ШАРАЛАРЫ: ЖҮРГІЗУШІЛЕРГЕ АРНАЛҒАН ЕРЕЖЕЛЕР

1. Газ құю алдында көлікті толық тоқтатып, қозғалтқышты өшіру қажет. Бұл – ең бірінші және басты ереже. Қозғалтқыш жұмыс істеп тұрса, от шығу қаупі артады;

2. Темекі шегуге және ашық от жағуға тыйым салынады. Көптеген жүргізуші бұл талапты елемей, қауіпке бейжай қарайды. Бірақ газ құю бекетінде темекінің бір ұшқыны – үлкен апатқа себеп болуы мүмкін.

3. Ұялы телефон, фотоаппарат, басқа да электронды құрылғыларды қолдануға болмайды. Бұл құрылғылардың өзінен де ұшқын шығуы мүмкін.

4. Жүргізуші мен жолаушылар көліктен түсіп, қауіпсіз қашықтықта тұруы тиіс.

5. Газдың иісін сезсеңіз, дереу қызметкерге хабарлаңыз. Газ кетіп жатса – үлкен қауіп. Ондай жағдайда құю процесі бірден тоқтатылып, арнайы апаттық қызмет шақырылады.

– Бекет аумағында алғашқы өрт сөндіру құралдары әрдайым дайын тұруы тиіс. Өрт сөндіргіштер, құм салынған жәшіктер және басқа құралдар белгіленген жерде болуы керек;

– Қызметкерлер өрт қауіпсіздігі бойынша арнайы нұсқамадан өтіп отыруы тиіс. Бұл білім апат кезінде дұрыс әрекет етуге көмектеседі; – Газ құю жабдықтары мен шлангілер үнемі тексеріліп, техникалық ақауы болмауы қажет;

– Бөгде адамдардың бекет аумағына рұқсатсыз кіруіне жол бермеу.

Есте сақтайық!

Автогаз құю бекеттері – қауіпті аймақ. Сондықтан мұнда тек тәртіп пен қауіпсіздік қана болуы керек. Өрт – ескерусіздіктен туады. Бір адамның бейқамдығы – бүтін бір мекемеге, адамдарға зиян келтіруі мүмкін. Сол себепті жүргізуші де, қызметкер де өз жауапкершілігін сезініп, қауіпсіздік талаптарын қатаң сақтауы тиіс.

Өрт қауіпсіздігі – жай қағида емес, бұл адам өмірін сақтау жолы. Әрбір тұрғын, әрбір көлік жүргізуші және қызметкер осыны түсініп, күнделікті әрекетінде қауіпсіздікке бейжай қарамауы керек.

Қауіпсіздік ережесін сақтау арқылы біз өзімізді ғана емес, айналамыздағы адамдарды да қорғаймыз.