ЭЛЕКТРОСАМОКАТТАРДЫҢ ӨРТ ҚАУІПСІЗДІГІ: НЕНІ БІЛУ ҚАЖЕТ?

Қазіргі таңда электросамокаттар – қалалық көліктің танымал түріне айналып отыр. Олардың экологиялық жағынан тиімділігі мен ыңғайлылығы жастар мен ересектер арасында кеңінен қолдануға жол ашты. Алайда бұл техника түрінің өз артықшылықтарымен қатар, белгілі бір қауіптері де бар, соның ішінде өрт қауіпсіздігі мәселесі ерекше назар аударуды қажет етеді.

Электросамокат неге жанады?

Электросамокаттардың өртке ұшырауына негізгі себептер мыналар:

– Литий-ионды аккумуляторлардың қызып кетуі;

– Арзан немесе сапасыз қуаттағыш құрылғыларды қолдану;

– Зақымдалған батареяны пайдалануды жалғастыру;

– Күн көзі астында ұзақ қалдыру немесе ылғал ортада сақтау;

– Жөндеу кезінде қауіпсіздік ережелерінің сақталмауы.

Қауіпсіздік шаралары

1. Тек өндіруші ұсынған қуаттағышты қолданыңыз. Арзан, беймәлім қуаттағыштар қысқа тұйықталуға себеп болуы мүмкін.

2. Электросамокатты үйде немесе жабық бөлмеде ұзақ уақыт бойы қуаттамаңыз. Мүмкіндігінше далада немесе желдетілетін жерде қуаттау ұсынылады.

3. Қуаттау кезінде самокатты қараусыз қалдырмаңыз.

4. Қызып кету белгілерін байқасаңыз – қуаттауды дереу тоқтатыңыз.

5. Құрылғыны тікелей күн сәулесінен қорғаңыз, жаңбыр мен қардан сақтаңыз.

6. Аккумулятор немесе сым зақымданса – білікті маманға жүгініңіз.

Төтенше жағдайда не істеу керек?

Егер электросамокаттан түтін шықса немесе жану басталса:

– Бірден өрт сөндіру қызметін 101 немесе 112 шақырыңыз;

– Сумен сөндірмеңіз! Литий-ионды батареяға су қауіпті, керісінше отты күшейтуі мүмкін;

– Қолыңызда ұнтақты өрт сөндіргіш болса – сонымен сөндіруге болады;

– Жанған жерден қауіпсіз арақашықтық сақтаңыз.

Қорыта айтқанда электросамокат – заманауи және тиімді көлік, алайда оның қауіпсіз пайдаланылуы – әрбір тұтынушының жауапкершілігі. Қарапайым қауіпсіздік ережелерін сақтау арқылы сіз өзіңіздің де, айналаңыздағы адамдардың да өмірін сақтай аласыз.