Бүгін аудан әкімінің орынбасары Самат Қыдырбекұлының төрағалығымен жастар арасындағы құқық бұзушылықтың алдын алу және қоғамдағы өзекті мәселелерді талқылауға арналған жиын өтті.

Іс-шараға Қызылорда облысы «Ақмешіт - Сырдария» мешітінің бас имамы Құрманбаев Дастан Жанасұлы және ардагерлер, білім, полиция бөлімдерінің қызметкерлері, белсенді жастар мен оқушылар қатысты.

Аудан әкімінің орынбасары қазіргі қоғамда жастар арасында жиі кездесетін лудомания (құмар ойындарға тәуелділік), нашақорлық, зорлық-зомбылық, буллинг, вейп және электронды темекі сияқты келеңсіз құбылыстардың зиянды салдарын атап өтіп, олардың алдын алу шараларын күшейту қажеттігін айтты. Сондай-ақ, жастардың тәрбиесіне ерекше көңіл бөлу арқылы бұл проблемаларды шешуге болатынын ерекше атап өтті.

Одан кейін, Бас имам Дастан Жанасұлы жастар арасында деструктивті діни ағымдарының таралуына алаңдаушылық білдіріп, мұндай мәселелерді шешуде ұлттық тәрбиенің маңызды рөл атқаратынын айтты. Аудандық ардагерлер кеңесінің төрағасы Асқар Мереков пен білім саласының ардагері Дастанбек Мырзабекұлы саналы ұрпақ тәрбиелеуде ата-аналардың жауапкершілігі мен ұлттық құндылықтарды сақтаудың өзектілігін ерекше атап өтті.

Аудандық полиция бөлімінің жергілікті полиция қызметі бөлімшесінің бастығы Қуандық Бейбітұлы жастар арасында топтық төбелестің алдын алу және құқық бұзушылықты азайту бойынша атқарылып жатқан жұмыстар туралы баяндады.

Жиын соңында аудан әкімінің орынбасары Самат Қыдырбекұлы қатысушыларға алғысын білдіріп, жастарды теріс әрекеттерден қорғау және олардың саналы әрі тәрбиелі азамат болып қалыптасуы үшін баршаға ортақ күш-жігер қажет екенін ерекше атап өтті.