Тілсіз жауға тосқауыл
Өрт – адамзаттың тілсіз жауы. Осы тілсіз жаумен күресте аудан көлемінде түрлі іс-шаралар тұрақты ұйымдастырылып келеді. Жаз маусымы да жақындап қалды. Күн ысыған сайын орман алқаптарында туындайтын өрттің саны одан сайын арта түседі. Әсіресе, дала өрті табиғатқа және мемлекетке орны толмас шығын әкеледі.
Осы орайда аудан көлемінде далалық жерде өрт пайда болған кезде мекеме, ұйымдардың және ерікті өрт сөндіру жасақтарының дайындығын тексеру мақсатында «Өрт – 2024» республикалық командалық-штабтық оқу-жаттығуы өтті. Бұл іс-шара табиғи өрт туындаған кездегі іс-қимылдарға басқару органдарының, азаматтық қорғаудың аумақтық кіші жүйесінің күштері мен құралдарының дайындық деңгейін арттыру мақсатында ұйымдастырылды.
Аталған іс-шарада тиісті сала мамандары «Самара – Шымкент» тас жолының бойындағы аудандық орман және жануарлар дүниесін қорғау жөніндегі мекемесінің тұқымбағында орман және дала өрттерінің алдын алуда өрт-тактикалық жаттығуы өтіп, күштер мен құралдардың әзірлігі тексерілді. Оқу-жаттығу жұмыстарына барлығы 81 адам мен 17 арнайы техника жұмылдырылды.
«ҚТ» ақпарат
