Дала жиынына «Қармақшы орман және жануарлар дүниесін қорғау жөніндегі мемлекеттік мекемесі», аудандық төтенше жағдайлар бөлімі, аудандық №10 өрт сөндіру бөлімі, аудандық полиция бөлімі, аудандық жедел жәрдем қызметкерлері және Иіркөл ауылдық округінің ерікті өрт жасақшылары қатысты. Оқу-жаттығу Батыс Еуропа – Батыс Қытай автодәлізінің бойындағы Қармақшы орман және жануарлар дүниесін қорғау жөніндегі мекемесінің тұқымбағында пысықталып, өрт сөндіру техникаларының күштік құралдарының әзірлігі тексерілді.

Тактикалық жаттығудың мақсаты – мекеменің өрт сөндіруші қызметкерлеріне өртті сөндіру әдістерін үйрету және өрт кезіндегі іс-қимылды жақсарту бойынша практикалық жұмыстар жүргізу.

Жиын барысында өрт сөндірушілер орман өртінің алдын алды. Жедел-штаб құрылып, өртті сөндіру тактикасы қаралды. Оқиға кезінде зардап шеккендерге жеделжәрдем бөлімшесі медициналық көмек көрсетті. Жедел әрекеттің арқасында өрт ауыздықталып, тапсырма тиянақталды. Тілсіз жауды тоқтатуға барлығы 45 маман, 9 техника жұмылдырылды.