Нысандар жайы бақыланды
Өткен аптада облыс әкімінің бірінші орынбасары Данияр Жаналинов ауданға келіп, аудандық білім бөліміне қарасты «Айгөлек» балабақшасы ғимаратының жай-күйімен танысты. Шараға аудан әкімінің орынбасарлары, бөлім және сала басшылары, мердігерлер қатысты.
Қазіргі уақытта «Айгөлек» балабақшасының ғимараты апатты ретінде танылып, уақытша көшірілген болатын. Облыс әкімінің бірінші орынбасары ғимараттың жай-күйімен толық танысып, мәселені шұғыл шешуге тиісті тапсырмалар берді. Алдағы уақытта жауапты мердігерлермен кездесулер өткізіліп, мәселенің шешімі анықталмақ.
Облыс әкімінің орынбасары Д.Жаналинов мұнан соң жұмыс сапарын III Интернационал ауылдық округінде жалғастырып, ондағы «Тұрған Тамы» шаруа қожалығы балық цехының жұмысын көрді.
Сапар қорытындысында бірқатар сала басшыларына тиісті тапсырмалар жүктеп, күрделі мәселелерді назарға алатынын жеткізді.
