Бірінші кезекте комиссия отырысында «Аудандық қоғамдық даму бөлімінің сыбайлас жемқорлық сипатындағы құқық бұзушылықтың профилактикалық шаралары туралы» қоғамдық даму бөлімінің басшысы Ғарышбек Нысанбаевтың хабарламасы тыңдалды. Онда аудандық бюджеттен 5 млн теңге қаржы бөлініп, 2 әлеуметтік жоба жүзеге асырылғанын, аудан бойынша түсіндірме жұмыстарына 400-ге жуық адам қатыстырылғаны жөнінде ақпар алдық. Сондай-ақ білім беру ұйымдарымен бірлесе 32 кездесу өткізіліпті. Facebook әлеуметтік желісінде «Stop жемқорлық» парақшасы ашылып, онда 100-ге жуық мақала жарияланған.

Мұнан соң «Жосалы кенті әкімі аппаратының сыбайлас жемқорлық сипатындағы құқық бұзушылықтың профилактикалық шаралары туралы» кент әкімі Шыңғыс Сыдықов баяндады.

Жиын барысында комиссия мүшелерінің ұсыныс-пікірлері тыңдалып, аудан әкімі тиісті сала басшыларына және кент, ауылдық округ әкімдеріне сыбайлас жемқорлыққа қарсы насихаттық жұмыстарды күшейту жөнінде бірқатар тапсырма жүктеді.

Келесі кезекте құқық бұзушылық профилактикасы жөніндегі ведомствоаралық комиссия отырысына жалғасты. «Аудандық жастар ресурстық орталығының жастар арасындағы қылмыстық және әкімшілік құқық бұзушылықтардың алдын алу бағытында 11 айдың қорытындысымен атқарған жұмыстары туралы» жастар ресурстық орталығының директоры Нұржұман Пірназаров сөз сөйледі. Мұнда аудан прокуроры Мейрамбек Маханбетжанов нәтижелі жұмысқа бастайтын әрекетке көшіп, қылмыстың алдын алу бағытында бірлесе жұмыс істеуге шақырды. Орталық директоры аудан әкіміне алдағы уақытта әлеуметтік жоба аясындағы аулалық клуб жұмысына қолдау көрсетуге ұсыныс білдірді. Аудан әкімі Жандос Еркінбекұлы келер жылы жастар арасында креативті, тың дүние ұйымдастыру ісін орталық директорына тапсырды.

Жиын соңында аудандық полиция бөлімі бастығының бірінші орынбасары Ермек Жандарбековтің «Аудандық полиция бөлімінің аудан көлемінде құқық бұзушылықтардың, жол-көлік қауіпсіздігі профилактикасы, мал ұрлығы және жалпы қылмыстар бойынша 11 аймен атқарылған жұмыстар туралы» хабарламасы тыңдалды.

Отырыс қорытындысында аудан әкімі күн тәртібінде көтерілген мәселелерге байланысты комиссия мүшелерінің ұсыныспікірлерін тыңдады. Сонымен қатар тиісті сала басшыларына жедел ақпарат алмасуға күш жұмсауды тапсырды.