Тері аурулары туралы біле жүріңіз

Негізгі инфекция көзі ауру адамдар, үй жануарлары және жабайы кеміргіштер болып табылады. Ол күнделікті тұрмыста қолданылатын заттар (тарақ, қайшы, киім, төсек жабдықтар және т.б.) арқылы, ауру адаммен байланыс орнатқанда, үй жануары және қаңғыбас жануарларды күту кезінде жұғуы мүмкін. Адамдар сонымен қатар, көпшілікке қызмет ететін мекемелерге барғанда (сауна, жасанды су қоймасы, монша, шаштараз, спорт кешендері), жеке гигиенаны сақтамағанда, ауру адамның тарағы, сүлгісі, бас киімдері, аяқ киімі, жеке заттарын қолдану барысында жұқтырады. Аурудың алғашқы белгілері теріде қызарған дақтардың (қабыршақтану) пайда болуы, тырнақтың сынуы, дененің қышуы, ашуы, бастың шаш орналасқан бөлігінің тақырлануы түрінде байқалады. Шаштың түсуі көбіне жас бүлдіршіндерде кездеседі.

Аталған дерттің алдын алу үшін жеке бас гигиенасының ережелерін сақтау қажет. Монша, сауна, бассейндерге жеке резинкалық аяқ киім киіп, қоғамдық орындарға барғаннан кейін, қолды мұқият сабынмен жуу керек. Қаңғыбас жанжануарлармен байланыспаған абзал. Сондай-ақ үй жануарларын міндетті түрде ветеринариялық дәрігерге көрсетіп тұрған абзал. Ал дерматомикоздың алғашқы белгілері пайда болған жағдайда дер кезінде тұрғылықты дерматолог дәрігеріне қаралуы керек.