Рухани қазынаның сақшылары
qarmaqshy-tany.kz Аудан әкімдігінің мәжіліс залында аудан әкімінің орынбасары Самат Смағұлов 24 қазан – Кітапханашылар күніне орай бірқатар сала мамандарына қабылдау жүргізді.
Оған кітапхана саласында ұзақ жылдар қызмет етіп, бүгінде зейнет жасына шыққан сала ардагері Жұпаркүл Бердібаева мен кітапханашылар қатысты.
Мерекелік қабылдауда Самат Қыдырбекұлы ұлт пен ұрпақтың сабақтастығына айналған рухани қазынаның сақшысы һәм насихаттаушысы болған сала мамандарын кәсіби мерекемен құттықтап, алғыс хаттар табыстап, жүрекжарды лебізін жеткізді.
– Әр таңын білімнің қайнар көзі кітаппен ашатын, сол кітаптағы асыл мұраларды оқырмандарға жеткізетін алтын көпірді байланыстырушы кітапхана мамандары. Ауданымыздың рухани-ағарту жолындағы еңбектеріңіз жандана берсін, – деді аудан әкімінің орынбасары өз құттықтауында.
Мерекелік іс-шарада айтыскер ақын Сырым Әділбеков арнау айтып, қабылдауда болған қонақтарға жырдан шашу шашты.
Аудан әкімінің баспасөз қызметі
