Маусым айы ерекше мерекелерге толы. Онда медицинаның, мемлекеттік қызметшілердің және полицейлердің кәсіби мерекесі қамтылған. Атаулы күндерді мерекелеу аудандық мәдениет үйінде өтті.

Мемлекеттік қызметшілер – билік пен қарапайым бұқара халықтың арасын жалғайтын алтын көпір. Полиция үшін қашан да қоғамдық қауіпсіздікті сақтау, адамдардың тыныш, бейбіт өмір сүруін тұрақты қадағалау – басты міндет. Ал дүние есігін жаңа ашқан сәби шақтан еңкейген қарттық кезең арасында медицина қызметкерлерімен сан мәрте ұшырасатынымыз хақ. Сол себепті де осы сала мамандарына барша адамзаттың айтар алғысы шексіз.

Жиында аудан әкімі Жандос Еркінбек сала қызметкерлері мен ардагерлерін кәсіби мерекелерімен құттықтап, жылы лебізін білдірді. Аудандық экономикалық дамыту және халықтың әл-ауқатын арттыру бағытында аянбай еңбек етіп жүрген мемлекеттік қызметкерлер мен тұрғындардың қауіпсіздігін қамтамасыз етіп отырған полиция қызметкерлеріне алғысын жеткізді.

Бүгінде ауданымызда барлығы 144 мемлекеттік қызметкер жұмыс істесе, қоғамдық тәртіпті қалыптастыру, ел тыныштығын қорғау жолында антына адал, ел қорғаны деген атаққа лайық 88 полиция қызметкері, сонымен қатар аудан халқына 74 дәрігер, 380 орта буынды медицина қызметкерлері қызмет көрсетеді.

Іс-шарада қызметте табысты еңбек етіп жүрген сала үздіктеріне облыс әкімінің және аудан әкімінің алғыс хаттары табысталды.

Жиын соңында аудан өнерпаздары көпшілікке мерекелік көңіл күй сыйлап, әннен шашу шашты.