Заңғар ойлы қаламгер
qarmaqshy-tany.kz АУДАНДЫҚ ОРТАЛЫҚ КІТАПХАНАСЫНЫҢ ОҚЫРМАНДАРҒА ҚЫЗМЕТ КӨРСЕТУ БӨЛІМІНІҢ ҰЙЫМДАСТЫРУЫМЕН ОҚЫРМАНДАРДЫ ҚАЗАҚ ЖАЗУШЫЛАРЫНЫҢ ШЫҒАРМАЛАРЫМЕН, ӨМІРІМЕН ТАНЫСТЫРУ, ЖАСТАРДЫҢ КІТАП ОҚУҒА ҚЫЗЫҒУШЫЛЫҒЫН АРТТЫРУ МАҚСАТЫНДА РЕСПУБЛИКАЛЫҚ «БІР ЕЛ-БІР КІТАП» АКЦИЯСЫ АЯСЫНДА АҚЫН ТӨЛЕН ӘБДІКТІҢ «ОҢ ҚОЛ» ӘҢГІМЕСІ БОЙЫНША «ЗАҢҒАР ОЙЛЫ ҚАЛАМГЕР» АТТЫ ФЛЕШБУК ӨТТІ.
Алдымен кітапханашы Назерке Жүсіпбекованың ақын, драматург, жазушы Төлен Әбдіктің өмір жолына арналған деректі бейнефильмін тамашалаумен басталған іс-шара одан әрі оның құрметті қонағы, халықаралық «Қазақ тілі» қоғамы аудандық филиалының төрағасы Гүлжауһар Раеваның ақын шығармалары жайлы естелігімен, ұйымдастырушыларға ізгі тілек білдіруімен жалғасты.
Содан соң Шоқан Уәлиханов атындағы №26 орта мектептің оқушылары ақынның «Оң қол» әңгімесінен жатқа үзінділер айтса, шараға қатысушылар режиссер Жәнібек Кәкімжанның түсірген «Оң қол» фильмін тамашалап, өз пікірлерін жеткізді.
Танымы мен тағылымы мол шараны аудандық орталық кітапханасының директоры Күлшара Қаниева қорытындылап, оның жоғары дәрежеде өтуіне белсене араласқан №26 орта мектептің бір топ оқушысына кітапхана дирекциясы атынан алғыс айтып, сый-сияпат жасады.
Нұрбай ӘБІЛАХАТҰЛЫ
