"Ауғанның отты жалыны" атты әдеби-тарихи кездесу кеші өтті
qarmaqshy-tany.kz №28 орта мектебінде 10 "а, б" сынып жетекшілері М.Нұралиева мен Н.Тарғанованың және тәлімгер А.Ешпанованың ұйымдастыруымен Ауған соғысының ардагерлерімен кездесуге арналған "Ауғанның отты жалыны" атты әдеби-тарихи кездесу кеші өткізілді.
Кездесу кешіне ауылымыздағы ардагерлер - Таубаев Қажығали Жүнісұлы мен Нұрғалиев Әбдуали Тасқараұлы құрметті қонақ ретінде қатысты.
Шара мектеп оқушыларының орындауындағы "Батырлар биімен" бастау алып, АӘТД жетекшісі А.Оспанов "Ауған соғысы: тарих, шындық, тағылым" тақырыбында баяндама жасады. Мектеп кітапханашысы А.Омарова Ауған соғысы жылнамасынан бұрыш ұйымдастырды. 10 сынып оқушылары "Ауғандағы арпалыс" атты сахналық қойылым көрсетті. Әмербек Бекнұр мен Арапбай Ардақ көркемсөз оқыса, Қанағат Зухра мен Сәлімханқызы Ақерке ардагер ағаларға арнап қазақ тілі мен әдебиеті пәнінің мұғалімі К.Ахатов шығарған арнау өлеңді оқып берді. Сырлы сұхбат кезеңінде ардагерлерге түрлі сұрақтар қойып, тұщымды жауаптар алды.
Қонақтар 10-11 сынып оқушыларына ҚР Қорғаныс министрлігінің әскерге шақыру учаскесіне тіркеу туралы куәлікті табыс етті. Кездесу кешін мектеп директоры А.Ж.Оспанов қорытындылап, ардагерлерге алғыс білдірді.
