Осындай тақырыппен Ақтөбе ауылындағы №109 орта мектепте алғашқы әскери даярлық және технология пәнінің мұғалімі Алмат Оразбекұлы мен 10 сынып жетекшісі Тұрсынай Берікбаеваның ұйымдастыруымен ауған соғысы ардагерлерімен кездесу кеші өтті. Оған аудандық Ауған соғысы ардагерлерінің төрағасы Асқар Ерманов пен ауыл тұрғыны, соғыс ардагері Сәбит Қанибаев арнайы қонақ ретінде шақырылды. Олар оқушыларға бастарынан өткен қиын қыстау кезеңдерді баяндап берді.

Кездесу барысында білім алушылар қызықтырған сұрақтарын қоюға мүмкіндік алды. Ардагерлер өз ойларымен бөлісіп қана қоймай, қазіргі жастарға бейбіт өмірді сақтауға, түрлі арандатушылыққа бой алдырмауға, Отан­ды қорғауға дайын болуға шақырды. Мектеп директоры Бақытбек Алмағамбетов батыр ағаларға алғыс айтса, кітапханашы Гүлназ Ешниязова көрме ұйымдастырды.