Жолдау бағыттары түсіндірілді

Жосалы кенті әкімі аппаратының мәжіліс залында аудандық қоғамдық кеңес төрағасы Ә.Құлдүйсеновтің төрағалығымен кеңес отырысы өтті. Оған аудандық ардагерлер кеңесінің төрағасы А.Мереков, Жосалы кенті ардагерлер кеңесінің төрағасы Е.Ұзақбаев, қоғамдық кеңес мүшелері және тұрғындар қатысты.

Күн тәртібінде Мемлекет басшысы Қасым-Жомарт Тоқаевтың «Әділетті мемлекет. Біртұтас ұлт. Берекелі қоғам» атты биылғы Жолдауынан туындаған бірқатар мәселелер бойынша аудандық қоғамдық кеңес төрағасы Ә.Құлдүйсенов хабарлама жасап, «Президент Қ.Тоқаевтың Қазақстан халқына Жолдауында жаңа, әділетті Қазақстанды құру жөніндегі кезекті қадамдар белгіленгенін, елімізде қордаланған мәселелерді шешу жолдары, халықтың әл-ауқатын одан әрі арттыруға бағытталған, мемлекетті одан әрі жаңғырту жөніндегі әлеуметтік қолдау шараларына қатысты жаңа міндеттеріне тоқталды. Сонымен қатар әлемдегі геосаяси шиеленістер мен қақтығыстар артқан уақытта еліміздің бірлігі мен тұтастығын көрсетуіміз керек. Ендігі кезекте демократиялық құндылықтарды дамытып, Жаңа Қазақстанды құруға қадам басқалы тұрғанымызды айтып өтті.

Отырыста жиынға қатысушылар Жолдауда ұсынылған іс-шараларды қолдап, еліміздегі өзекті мәселелерді шешу жолдарын ортаға салды.

Кеңес отырысын оның төрағасы Ә.Құлдүйсенов қорытындылап, көпшілікті Мемлекет басшысының, халыққа жолдаған Жолдауын қолдауға шақырды.

"Қт" ақпарат