Жаңа штамм: Қазақстанда қайта карантин енгізіле ме?
Денсаулық сақтау министрі Ажар Ғиният коронавирустық инфекцияның «стелс-омикрон» жаңа штамы туралы айтты, деп хабарлайды Egemen.kz.
Ведомство басшысының айтуынша, «стелс-омикрон» Қазақстанның 12 өңірінде, негізінен, Алматы, Нұр-Сұлтан сияқты ірі мегаполистерде анықталған.
«Коронавирустық инфекцияның бұл түрі «дельтаға» қарағанда жеңілірек. Бірақ қауіпі де аз емес, өйткені ол тез таралып, қайталанатын ауруға әкеледі. Сырқаттанушылық деңгейіне күн сайын мониторинг жүргізіледі. Симптомдармен емделетін барлық пациенттер толық ем алады. Біз бұл штамм аурудың осындай ағымында қандай да бір карантиндік шараларға әкеледі деп ойламаймыз», деді Ажар Ғиният.
Министр қазір барлық карантиндік шаралар алынып тасталғанын және негізінен халық арасында профилактикалық жұмыстар жүргізіліп жатқанын айтты.
