Жақын танитын, аралас-құралас болған жақсы әулеттің қызын көрсе үлкендеріміз құдандалы болғысы келетіні жасырын емес. Қыз айттыру – көнеден бар дәстүр. Жастайынан кәсіпке бейімделіп өскен тәуелсіздік құрдасы Нұрсұлтан Алтынбекұлы мен оның сүйікті жары Фариза Әлібекқызының ата-аналары отбасылық достар. Олардың құда болсақ деген тілектері қабыл болып, кішкентайынан тай-құлындай тебісіп қатар өскен қыз бен жігіттің достығы сүйіспеншілік сезім мен мөлдір махаббатқа ұласқан. Бірі 20, бірі 19 жасында шаңырақ көтерген жастардың отасқандарына биыл – 10 жыл.
Нұрсұлтан бірер жыл бұрын аудан орталығында жоқ тың кәсіптің түрі – кілем жуу орталығын ашса, Фаризаның тәтті торттар пісіретініне міне 5-6 жылдың жүзі болды. Қармақшыдағы ең дәмді әрі бағасы көлеміне сай торт жасайтын кондитерлер қатарында осы келіншек көш бастап тұр. Жарасымды жұптың аудан халқына көрсетіп жүрген сапалы қызметіне жерлестері дән риза. Жақында қос кәсіпкердің қонысында болып, олармен жақынырақ тілдескен едік.Сауда саласында қызмет еткен белгілі кәсіпкер Алтынбек Демесіновтің балалары да осы салаға бейім өсті. Шаңырақтың кенжесі Нұрсұлтан да дәулетті отбасынан шықтым деп қызмет таңдамады. Жалданып жұмыс та істеді, 18 жасынан базарда киім де сатты. Күш жігерім барда неге қамданбасқа деп үйінің ауласынан көлеңке жасап, қолдап кілем жуды. Жұмысбасты жандар уақыты болмаған соң қандай қызметті болса да ақысына істетуге бар. Аяқ астында жатқан соң төсеніш кірлемей тұрмайды. Жылына бір жууға тура келеді. Оны тазарту үшін жазды күтудің қажеті жоқ. Жыл он екі ай қызмет көрсететін Нұрсұлтанның «Нұр таза кілем» орталығына хабарлассаңыз бол­ғаны өзі алып кетіп, небәрі 1 күнде жуып, кептіріп, дү­кеннен әкелген­дей етіп бе­реді.
Жұмыс барысы қалай жүретінін біл­мек үшін кілем жуу орталығын ара­лап көрдік. Іші кең, барлық қажетті техникаларын Түркиядан тапсырыспен алдырған. Бір бөлме кептіру құралдарымен жабдықталған. Жігіт­терде бос уақыт жоқ, күнделікті жұмыстарын жасап жатыр. Жуылған кілемнің, енді жуылуға кезекте тұрғанын санауға саусақ жетпеді. Бұл – орталықтың қызметіне көптің көңілі толатынын аңғартады.
– Осы техниканың барлығына 12 млн теңге жұмсадым. Тапсырыс жаман емес. Қыс, жаз деп мезгіл таңдамаймыз. Күніне 10-15 кілем жуамыз. Былтыр «Еңбек» мемлекеттік бағдарламасы аясында «Бастау Бизнес» кәсіпкерлік негіздері курсын аяқтадым. Соның арқасында «Кілем жуу орталығы» жобасын қорғап, 583 мың теңге мемлекеттік грант ұтып алдым. Грант қаражатына бизнес жоспарға сәйкес 2 дана кілем жуу құрылғысын алдым.
Аудан орталығынан бөлек, ауыл­дық жерлерден тапсырыс­тар түсіп жатады. Арнайы көлікпен тасымал қызметін де ұйымдастырдық. Қосымша екі адамды жұмысқа алдым. Бізге келген тапсырыс еш уақытта кері қайтқан емес. Әр тапсырысқа мұқият қараймыз. Егер ойдағыдай жуып бермесек келесі жолы біздің орталыққа келмейтін болады. Ал біз істеген дүниеміз сапалы шыққанын қалаймыз. Барлығын тексеріп, қабылдап алады. Тұрғындардың дені ризашылығын білдіреді деп сеніммен айта аламын, – дейді жас кәсіпкер Нұрсұлтан.