К.Рүстембеков атындағы жыраулар үйінің ұйымдастыруымен «Болашаққа бағдар: рухани жаңғыру» бағдарламалық мақалалар аясында, 2022 жыл – Балалар жылына орай 8 наурыз – Халықаралық әйелдер күні мерекесі қарсаңында «Аналар – асыл жандар, ардақтылар» атты аудандық жас ақындар айтысы болып өтті.

Айтыстың басты мақсаты - қазіргі айтыс өнеріне бет бұрған жастарымыздың шығармашылығын дәріптеу, аяқ алысын, жетістігі мен жеңісін сараптау. Халық арасынан таланттарды тауып таныстыру, насихаттау болып табылады.

Қорқыт атамыздың мәңгілік мекені болған қасиетті Қармақшы өлкесіндегі бұл ақындар айтысына ауданымыздың елді-мекендерінен қара домбырасын жанына серік етіп, жақұт жырларымен елдің мерейін асқақтатуға келген жас ақындарымыз қатысты.

Сазгер, ақын, ұстаз Ж.Тұрымбетов, жырау, К.Рүстембеков атындағы жыраулар үйінің директоры А.Ешбаева, күйші, ақын Б.Аққалиевтер қазылық еткен дүбірлі додада бас жүлдеге тұрмағамбеттік ақын №29 мектептің оқушысы Смайылұлы Бекқанат ие болса, бірінші жүлделі орынды төретамдық №85 мектеп оқушысы Жалғасбаев Еркебұлан иеленді. Жүлделі екінші орынмен №250 мектептің оқушысы Ердаулет Орынбасаров пен №29 мектептің оқушысы Оңғарқызы Арай марапатталса, үшінші орынды №250 мектеп оқушысы жас ақын Карабдинов Қайсар мен №29 мектептің оқушысы Мархабатова Шұғылалар бөлісті.