Ерекше жандар ел назарында

АЙНАЛАНЫ БІР СӘТКЕ БОЛСА ДА КӨРУ – ЗАҒИП ЖАНДАР ҮШІН ҚОЛ ЖЕТПЕС АРМАН. ЖАЗМЫШТЫҢ ЖАЗУЫМЕН ЖАНАРЫНАН АЙЫРЫЛҒАН ЖАНДАРҒА АРНАЛҒАН ІС-ШАРА ЖЫЛ САЙЫН ҚАРАШАДА АТАП ӨТІЛЕДІ. АУДАНДАҒЫ Т.САЛҚЫНБАЙҰЛЫ АТЫНДАҒЫ ӨНЕР МЕКТЕБІНІҢ МҰҒАЛІМДЕРІ МЕН ОҚУШЫЛАРЫ БИЫЛ ДА ДӘСТҮРІНЕН ЖАҢЫЛЫСПАЙ ХАЛЫҚАРАЛЫҚ ЗАҒИПТАР КҮНІНЕ ОРАЙ «ЖҮРЕК ЖЫЛУЫ» АТТЫ КОНЦЕРТТІК БАҒДАРЛАМА ҰЙЫМДАСТЫРДЫ.

Мерекелік жиынға өнер мектебінің директоры Дәулет Байғараев, Жосалы корпоративтік қорының басшысы Асқар Қолдабеков, «Аңсаған» мүмкіндігі шектеулі балалар қоғамдық бірлестігінің төрайымы Бақыткүл Райымбаева, облыстық «Қоғамдық келісім» мекемесінің аудандағы сарапшы маманы Ақтолқын Нұрмағанбетова және аудандағы зағип жандар қатысты.

Концерт барысында әуелі қонақтар мереке иелеріне жақсы тілектерін жеткізсе, өнер мектебінің өнерпаздары әртүрлі аспапта өнер көрсетіп, әннен шашу шашты.

Басқосуда кеш қонағы Қуандық Бекбаев ақсақал іс-шараны ұйымдастырған барша жандарға алғысын айтса, қоғаммен әрдайым бірге екенін сезінген зағип жандар өз ризашылықтарын білдіріп, жақсы көңіл күймен тарқасты.