ӘКЕ ҮМІТІН АҚТАҒАН ҰЛ
Кәсіп дегенімізде, бірінші кезекте атадан балаға мирас болып келе жатқан дәстүрлі өнер түрі ойға оралады.
Дей тұрғанмен уақыт, заман талабына сәйкес туатын кәсіп түрлері де болады.
Ата-бабасында етікшілік кәсіппен айналысқан ешкім болмаса да екі қолға бір күрек деп етік тігу кәсібін
бастап жіберген жанның бірі Ахан Байжанов.
Азан шақырып қойған аты Әлімхан болса да туған-туыс, жақын-жуық оны ата-ана еркелетуімен Ахан атап кетіпті.
Бүгінде өзінің шағын аяқ киім шеберханасында кәсібін дөңгелетіп отырғанжігіт ағасын жосалылықтар алтын қолды шебер ретінде таниды.
Ахан Нәзіметұлы 1970 жылы Жосалы кентінде дүниеге келген. Шаңырақтағы 8 баланың бірі, ІІ топ мүгедегі. Отбасылы. 1991 жылы жаңақорғандық Сисенкүл Назарымбетовамен бас қосқан. Екеуінің ортасында Қайыржан есімді перзент бар. Сисенкүл де, Қайыржан да ІІІ топ мүгедектері.
1993 жылы аудандық тұтыну комбинатында етікші болып еңбек жолын бастаған Ахан бұл кәсіптің терең сыры мен қырын өзін еңбекке алғаш баулып, ұстаздық құшағын ашқан шебер қолды Қобылан ағасынан үйренген болатын. Әр істің жөн-жобасы, есеп-қисабы болады демекші, Ахан ұстазынан көп нәрсе сырына қанықты. Үйреніп қана қоймай, ойға тоқыды, ойға тоқығанын тәжірибеде жүзеге асыра білді.
Мүмкіндігі шектеулі жанның сүйікті кәсібімен шұғылдана бастағанына да биыл жиырма жылдан асады екен. Осы жылдар ішінде халыққа қалтқысыз қызмет етіпті. Еңбегінің жемісін көріп келеді. Алақанына уыс-уыс ақша ұстамаса да отбасының күнделікті күнкөрісіне кәсібі жарап-ақ тұр.
Мақала барысында бізге аяқ киім жөндеудің кәнігі шебері атанған кәсіп иесімен жүздесіп, онымен ашық әңгіме өрбітудің реті келгендей. Біз оны жұмыс шеберханасынан таптық. Ертемен кәсібін бастап кеткен шебер тапсырыстармен жұмыс жасауда екен.
-Қытайдың бір рет киіп, екінші рет тігуге жарамсыз болып қалатын аяқ киімдерін маған көп әкеледі. Шырайын шығарып тігіп, жамап, жапсырып беремін. Тапсырысты уақытында бітіріп беруге тырысамын. Аспандағы бағаны да қоймаймын. Халықтың қалтасына тиімді, қолжетімді бағада қызмет көрсетеміз. Халықтың келуі жаман емес. Кей жағдайда тапсырыс берушінің тиын-тебені жетпей қалып жатады. Мұндайда бос қайтара алмаймын. Қазіргі кезеңде өзімнің ескі тігін машинаммен жұмыс жасаудамын. Көн, шеге, желім сынды қажетті заттарды Түркістан қаласынан, арнайы дүкендерден өзім сатып әкелемін. “Шебер шебер емес, құрал шебер” дегендей, жабдықтарымды жаңартқым келеді. Әттең, бағасы қымбаттау болып тұрғаны. Ондай мүмкіндікке ие болсам, мәсі де тіге берер едім. Кәсіп аясында көптеген жоспарларым: шеберхананы кеңейтіп, бөлмелерін көбейтсем деген алда мақсатымыз бар,-дейді шебер.
Оның шеберхана бөлмелерін көбейткіміз келеді деген сөзінде үлкен мән бар. Жары Сисенкүл де қолөнер кәсібінен құралақан емес. Көрпе көктеп, көрпеше тігеді. Құрақ құрайды. Өткен жылы несиеге тігін машинасын алып, үйде тапсырыс қабылдап жатқан жайы бар. –Үстіміздегі жылы “Ақниет” әлеуметтік бағдарламасына қатысқанмын, бірақ ұта алмадым. Келешекте бұл жобаға тағы да қатысуға ниеттімін. Шеберханамыз кеңейіп жатса, бір бөлмесін тігін цехына арнағымыз келеді,-дейді Сисенкүл.
Аханның аяқ киім шеберханасын ашуға 90-шы жылдары әкесі Нәзімет себепкер болыпты. Елімізде кәсіпкерлікке енді бетбұрыс жасай бастаған жылдары уақыт тынысын тап баса білген еңбекқор әке баласына есік алдынан шеберхана салуға ұсыныс білдіріпті. Әке ұсынысын құп алған Ахан бұл шешіміне әрқашан да ризалықпен қарайды. Әкесі өмірден озса да оның берген ақылының арқасында ерінбей еңбек етіп, ешкімге кіріптар болмай отбасын асырауда.
Сәрсенкүл ЖАУДАТБЕКҚЫЗЫ.
