Бөтен идеологияның жетегімен жүруге болмайды

Президентіміздің соңғы шыққан «Тәуелсіздік бәрінен қымбат» атты мақаласы жастардың көкейінде ерекше ой тудырарлықтай. Мақаладағы келтірілген еліміз туралы тарихи деректерді оқи отыра, халқымыздың бастан өткерген жағдайы, өткен-кеткені көз алдыма елестеуде. Сондай-ақ мақала оқу барысында, осы уақытқа дейінгі жасалған еңбектерді оқи келе еліміздің жастардан күтер үмітінің зорын аңғардым. Тек қана үміт күтіп қоймай, алдағы сын-қатерлерге, қиындықтарға төтеп бере алатындай болашақ ел азаматтары мен азаматшаларын дайындауда еліміз алға қойған үлкен мақсат екенін аңғардым. .

Мақаладағы мені қуантқан тақырып – бірі елімізді әлемге кино индустриясы арқылы таныту. Түріктің, үндінің, кәрістің, қытайдың, тағы басқа мемлекеттердің киносын шетелден сатып алып, өскелең ұрпаққа көрсетіп, өзгенің тарихынан сыр шерткенше өз тарихымызды дәріптеу анағұрлым маңыздырақ. Тарихымыз жайында түсіріліп, жазылған кинолар мен томдық кітаптар әлемдік бестселлерге айналары анық. Шынымен де Мемлекет басшысы айтқанындай, «Әрбір халық өзінің арғы-бергі тарихын өзі жазуға тиіс. Бөтен идеологияның жетегімен жүруге болмайды. Ұлттық мүдде тұрғысынан жазылған шежіре ұрпақтың санасын оятып, ұлттың жадын жаңғыртуға мүмкіндік береді» деген сөзінің астарында мән-мағына жатыр.