Қармақшы ауданы әкімдігінің ұйымдастыруымен «Жыл Жомарты - 2020» номинациясы бойынша пандемия кезеңінде халық саулығы үшін алдыңғы шепте жүрген белсенді азаматтар марапатталды.

Жиында сөз алған Қармақшы ауданының әкімі Мұса Қалдарбеков - «Індеттің таралуының алдын алу мен қарсы күрес бағытында жерлестеріміз де айтарлықтай үлес қосып жұмыс жасады.

Бизнес субьектілері өздері қиындықтарға тап болса да, тұрғындарға белсенді көмек көрсетті. Осы ретте пандемия уақытында ынтымақ пен бірлігімізді сақтап, қолдау көрсеткен барлық мекеме басшыларына, дербес бөлімдер мен кәсіпорындарға, ауданымыздағы қарпайым еңбеккерден еңкейген қартқа дейін үлес қосып індетті жеңуде қызмет еткен барша жандарға, жеке кәсіпкерлер мен шаруашылықтарға, Қармақшыдан жырақта жүрсе де ел игілігі жолында жанашырлық танытқан барша азаматтарға шын жүректен алғысымызды білдіреміз», - деді аудан басшысы.

Өздеріңіз білетіндей, үстіміздегі жыл короновирус пандемиясының таралуына байланысты айрықша кезең болды. Індеттің таралуы дағдарыс тудырып, адамдар мен қоғамның үйреншікті өмір салтын бұзғаны белгілі.

Бүгінгі өткен шара барысында жомарттық танытып, қайырымдылық шараларына белсенді қатысқан ел азаматтары мен шаруашылықтардың басшыларына «Жыл Жомарты-2020» номинациясы табысталды.

Ауданымызда сақтық шараларын үнемі насихаттап және індеттің ушығуына жол бермеген сала мамандары, карантин талаптарын қатаң сақтауға ерекеше үлес қосқан жеке кәсіпкерлер аудан әкімінің «Алғыс хаттарымен» марапатталды.

Сонымен бірге әр салада белсенділігімен ерекше көзге түсіп, қызмет атқарған сала майталмандарына «Жыл үздіктері -2020» номинациясы табысталды.