Жәрмеңкеге келген жұрттың қарасы қалың. Барлығы жергілікті өнімдерді арзан бағада сатып алуды көздеді. Жалпы Қармақшы ауданы қала тұрғындарына 70 көлікпен керуен аттандырды. Оның ішінде ауданға қарасты ауылдардың шаруалары ақ күріштің 25 тоннасын, асқабақ пен қауын-қарбыздың 40 тоннасын, бақша өнімдерінің 35 тоннасын жәрмеңкеге жеткізді. Одан бөлек сүт, ет пен балықтан 5 тонна, жоңышқаның 2000 данасы және күріш қалдығы, мал азығының 45 тоннасы сатылымға шықты.

– Қалада тұрғаныммен Қармақшылықпын. Сол үшін үйге туған жерімнің өнімін апаруды жөн көріп, арнайы келдім. Қарбыз бен қауынның бірнешесін, күріш пен бақша өнімдерін сатып алдым. Жұбайым бұған қуанатыны сөзсіз, – дейді Нұрбол Айтқалиев.

Аудандық ауылшаруашылық бөлімінің мәлімдеуінше мұндағы өнімдер базар бағасынан 15-20 процентке арзан сатылған. Содан шығар жәрмеңкедегі сауда қызу жүріп жатты. Осылайша Қармақшы "қала күніне" ауылшаруашылық өнімдерімен тарту жасап, қала тұрғындарын жергілікті азықпен қамтамасыз етті.

Одан бөлек, Нұр-Сұлтан қаласы күніне орай 19-20 қыркүйекте жәрмеңке өтті. Оған өңірден 360 тоннаға жуық өнім жеткізіліп, Қармақшыдан жалпы көлемі 40 тонна болатын Сыр маржаны күріші мен тәтті қауын-қарбыз, асқабақ елордалықтарға ұсынылды.