Еріктілік әр адамның жүрек қалауымен жүзеге асырылатын сүйікті ісі десек те болады. Дәл қазіргідей індет шарпыған кезеңде еріктілер көмегі аса қажет екені де даусыз. Ауруханадағы қаншама науқас, жалғыз басты қарт кісілер, көп балалы отбасылар, басқа да көмекке зәру қаншама бауырларымызға Сіз бен біздің ерікті түрдегі шын ниетімізбен жасаған қолдауларымыз қажет-ақ.
Қиналған шақта қол ұшын созып, өз басын қатерге тіге білетін де достарымыз бар ортамызда. Бүгінгі тақырыбымызға облыстық Жастар ресурстық орталығының жанынан құрылған «Еріктілер фронт офисінің» «Сабақтастық» бағыты бойынша еріктісі, белсенді жас Бүркітбай Ақбаян есімді қарындасымызды арқау еткелі отырмыз.
Өткен жексенбі күні ерікті жастарымыз облыстық Төтенше жағдайлар департаментімен бірлесе судағы қауіпсіздік мәселелері бойынша рейдтік түсіндіру шараларын жүргізген болатын. Сол сәтте ХҚКО жанындағы сол жағалаумен байланыстыратын көпірдің арғы бетінде белгісіз азаматшаның өз еркімен суға түсіп, қимылсыз жатқаны анықталған. Қызылорда облыстық ТЖД қызметкері Бексұлтан Бижігіт, қала тұрғыны Қадыров Дастан және рейд бойынша түсіндіру жұмыстарын жүргізіп жүрген еріктіміз Бүркітбай Ақбаян Бахытқызы дереу көмекке жүгірген. Нәтижесінде судағы азаматша құтқарылып, облыстық медицина орталығына тексеруге жіберілді.
Қазағымыздың осындай жомарт жүректі жандары барда еліміздің еңсесі биік, көк туымыз өз биігінде мәңгілік желбіремек.
Аймағымыздың барша жастарын өз замандастарынан үлгі алып, еріктілер қатарында елге қызмет етуге шақырамыз. Өзгені қуанту үшін материалдық жағдай маңызды емес екенін жеткізгіміз келеді.
Еліміз аман, жұртымыз тыныш болғай.