Көктем – кетпені сайлаулы, шығыры майлаулы диқан қауымының жер жыртып, егін салуға асығатын мезгілі. Биыл ауа-райы күрт жылып, диқандарға қарасты. Серіктестік 74 гектарға жаздық бидай дақылын ексе, 13 гектарға жаңа жоңышқа, 16 гектарға ескі жоңышқа дәнін септі. Қазіргі таңда мұнда ерте көктемдік бидай егу науқаны жүруде. Мамандардың айтуынша, дәнді топырақтың тұқым сіңірілетін тереңдігі 5-7°С-қа жылыған кезде-ақ себе бастайды. Өйткені, ерте себілген дән – ерте піседі.

Айта кеткен жөн, жақында аймақ басшысы Қ.Ысқақов ауданға жұмыс сапарымен табан тіреді. Бірқатар нысанды аралаған соң ІІІ Интернационал ауылындағы «Абай-Дәулет» ЖШС қарасты егіс алқабында болды. Онда облыс әкімі шаруашылықтың жаңа бастамаларына сәттілік тілеп, қашан да қолдау көрсетуге дайын екенін айтты.

«Егін ексең – шығырыңды майла, мал өсірсең, қонысыңды сайла» дейді қазекем. Ал сәуір айының екінші онкүндігінде басталатын егін науқанына біздің диқандар қаншалықты дайын?

Аудан бойынша 332 канал тазалануы керек болса, оның 250-і тазаланған. 101 гидротехникалық құрылыстардың 88-і жөнделген. Ал 13 насостың 11-і дайын, 44 гидробекеттің 36-сы жөндеуден өткен. Көктемгі дала жұмысына жалпы 152 трактор қатысады деп күтілуде. Бүгінде оның 76-сы дайын тұр. 44 соқаның 38-і, 24 тұқымсепкіштің 20-сы сайлаулы. Сондай-ақ, 62 автомашинаның 45-і, 94 трактор тіркемесінің 74-і жөнделген. Ал қажетті 10 400 тонна минералды тыңайтқыштың 6024 тоннасы егістік басына жеткізілген. Қысқасы, көктемгі егіс науқанына дайындық қызу жүруде. Барлық шаруашылық сәуірге дейін сақадай-сай тұрмақ.

Алғашқы дән себілгеннен бастап алты ай жер кеудесін сауып, бел шешпей еңбектенетін дала еңбеккерлерінің өнімі күз сайларда қамбаны мол астыққа толтырары шүбәсіз.