Бақытты балалар ордасы - "Балбөбек"
Бала – өмірдің гүлі, кімнің де болса жүрегінің бір парасы. Баласына бақыт сыйлау үшін әрбір ата-ана өз халінше еңбек етуде. Артынан ерген ұрпағына саналы тәрбие мен білім беру – ата-ананың парызы. Осы ретте күйбең тіршіліктің қамытып арқалап жүрген ата-ана қажеттілік үшін балапанын балабақшаға апарады. Бүгінгі балабақшаның әлеуеті қандай?
Бар білімнің бастауы, келешек өмірдің иесі, жасампаз болашақты даярлайтын киелі мекен – балабақша. Ол бүлдіршіннің білімді, өмірді, өнерді игеруге деген алғашқы қадамы. Осы тұста балабақша ұжымына артылар жауапкершілік көп. Себебі олар елдің ертеңін, болашақтың тұтқасын ұстар ұрпақ тәрбиелеуде. Бүгінде мемлекеттің қолдауымен балабақша саны артуда. Бұл қуанарлық жайт. Дегенмен сан көбейгеннен кейін, сапа міндетті түрде сұралады. Қазіргі балабақшаға қойылар талап та, талғам да өзгеше.
Қармақшы ауылында іссапарлап жүргенімізде алыстан көз тартып, мен мұндалап тұрған балабақшаның тұсынан бейғам өтіп кете алмадық. Жаңалыққа жаны құмар жан ретінде көз тартқан әдемілікті жақыннан көруге асықтық. Аулаға кіре бергеннен-ақ түрлі бұйымға назар салдық. Анықтап зер салғанда ғана тұтынуға жарамсыз заттардан дайындалғанын көрдік. Қажетсіз бұйымды кәделі етіп, ерекше өрнек беріп, пайдаға асырып отырған балабақша ауласы өте кең. Мұнда балалардың кең тыныстап, еркін ойнауына барлық жағдай жасалған. Бар сұлулық пен ерекше жылылық сезілген мекен – 55 жылдық тарихы бар «Балбөбек» балабақшасы.Құтты мекенге кіре бергеннен-ақ бөбекжай меңгерушісі Дәмекүл Бекмақанова қарсы алып, балалардың бал мекеніне бастады. Сыртқы сұлулыққа тамсанып жүрген біздер мекеме ішіне кіргенде өзгеше бір әлемге енгендей болдық. Қабырғалары ерекше дизайнмен әрленген. Құдды бір ертегілер елінде жүргендейміз. Бөлім меңгерушісі бөбекжай бөлмелерін аралата жүріп, тарихтан сыр шертті.
Тәрбие иірімдері мен әсемдікті бөбек бойына ұялата білген «Балбөбек» балабақшасының іргесі сонау 1965 жылы қаланған. Сол жылдан 1992 жылға дейін Елизавета Феодовна, Рыскүл Нұрғалиевалар меңгерушілік еткен. Оңтайландыру кезінде балабақша жабылып, ғимарат №113 «Қаракөл» орта мектебінің балансына берілген. 12 жылдан соң, яғни 2004 жылы №13 «Балбөбек» балабақшасы қайта ашылып, оған Пақтыгүл Жұмадиярқызы меңгерушілік етіп, елеулі еңбек еткен. Ал 2015 жылдың қыркүйегінен бері Дәмекүл Сейтқанқызы бөбекжай тізгінін ұстап, басшылық жасауда. Бұрындары «балабақша» аталған бұл мекеме, ауылда 3-6 жасар бала санының азаюына байланысты 2016 жылдан бері «бөбекжай» болып өзгертілген. Бүгінгі таңда бөбекжайда 3 топта 60 бүлдіршін тәрбие алуда.
Балабақшаның жақсы жетістікке жетуі әрбір үйдің еркесінің еркелігін көтеретін қызметкерлердің арқасы. Мекемеде 10 педагог, 14 техникалық қызметкер бөбекжай бөбектері үшін аянбай қызмет етуде. Жыл сайын түрлі курстарда білімін жетілдіретін педагогтардың ізденімпаздығы жасаған жұмыстарынан айқын көрініп тұр.
Өзге бөбекжайда кездесе бермейтін ерекше бөлме – ардагерлер бөлмесі. Үлкенді ардақ тұтып, олардың еңбегін елеген ұжымның жұмысы оң нәтиже берері анық. Ардагерін құрметтеген қызметкерлердің ұйымшылдығы көрініп тұр. Бір-бірін ә дегеннен-ақ түсінетін олар балаларға да мол мейірім беруде. Оны бүлдіршіндердің емін-еркін, күлімсіреп жүргенінен аңғардық. Бізге қысылмастан музыка жетекшісімен бірге әсем ән шырқап, бал тілдерімен тақпақтарын да айтып берді. Бұл – бөбектерді көркем өнерге баулыған педагогтардың ерен еңбегінің жемісі. Айта кетерлігі, бүлдіршіндердің ой-өрісін дамытуға арналған түрлі үйірмелер жұмысы да жүйелі жүргізіледі. Нақтылай кетсек, «Әнді сүйсең менше сүй» үйірмесі оларды әуелете ән салуға баулыса, «Киіз терапиясы» қол моторикасын дамытып, көркем еңбекке үйретеді. Ал «Спорт – сенің серігің» атты үйірмеде бөбектер шымыр болуға ұмтылса, «Ойнайық та ойлайық» үйірмесінде ойын арқылы таным көкжиегін кеңейтеді. Онан бөлек, «Балапан» би үйірмесінің бөбектері әрбір ертеңгілікте өз биімен көрік болады.
Сондай-ақ бұл бөбекжайда спорт бөлмесі ерекше жабдықталған. Бөбектердің арнайы киімі де дайын. Балапанның ерте жастан спортты жанына серік етуіне толықтай жағдай жасалған. Бөлме кең, жылы әрі жарық. Дені сау, саламатты ұрпақ қалыптастыру жолында мұндай спорт бөлмесі әрбір балабақшаға керек-ақ.
Бұл бөбекжайдың кереметі мен ұйымшыл ұжымның еңбегін айтып тауыса алмаспыз. «Ертегілер әлемі» атты қуыршақ театры барлық бөбекжайда бар. Бұл театрдың өзгешелігі – педагогтар қажетті дүниенің барлығын өз қолдарымен жасағаны. Аң-құс, жан-жануар, түрлі қуыршақтар көздің жауын алады. Әрбір шараға арналған киімді де ата-анаға салмақ түсірмей ұжым қызметкерлері өз қолымен тіккен. Бөбекжай қорында 137 дана балаларға арналған арнайы киім бар. Бұл киімдерді әзірлеуде бөбекжай меңгерушісі Дәмекүл Бекмақанова мен әдіскер-психолог Жаңагүл Қарабатырованың еңбегі зор.
Бөбекжай ішін аралап жүргенде Рухани жаңғыруға арналған ұлттық бұрыш ерекше көзге түсті. Әрбір бұйым ұлттық ою-өрнектермен безендірілген. Қазаққа ғана тән дүниелер орын алған бұрыш бөбектер үшін аса пайдалы. Бала кезден ұлттығымызды ұлықтаған мекеннен тәлім алған бөбектің ұлтжанды болып өсері анық.
– Біздің міндетіміз – тәрбиеленушілерге бақыт сыйлау. Жүсіп Баласағұнның «Үйренер нәрсең – білім мен мейірімділік» дегеніндей балабақшаның балаға берері – махаббат, сүйіспеншілік, мейірім, қамқорлық. Педагогтар әрбір күнін ізденіспен өткізеді. Себебі біз балаға қоршаған ортадағы құбылыстарды түсінуге көмектесуіміз қажет. Бала жанының бағбандары ғана оның қаншалықты сезімтал екенін бағалай алады. Бала – өмір гүлі. Ал гүлдер ешқандай жасандылықсыз, шынайылықпен баптағанда ғана өседі. Бойымыздағы бар білімімізді, асыл қасиеттерімізді періште бөбектерге арнай білсек, олардың жүрегіне жол тауып, өзіндік «мені» бар дәрежеге жеткізсек, Отанды, адамзатты сүюге тәрбиелесек – міне, біздің бөбекжайдың нағыз мейірім алаңына айналғаны, – дейді меңгеруші Дәмекүл Бекмақанова.
«Балбөбек» бөбекжайының ұйытқысы, іскер басшы Дәмекүл Сейтқанқызы бүлдіршіндердің жан-жақты қорғалған, үйлесімді тұлға болып қалыптасуы үшін ізденімпаз ұжымымен еселі еңбек етуде. Басшының біліктілігі оның өз мекемесі туралы мәліметтің барлығын егжей-тегжейлі біліп, бақылауында ұстауында. Қандай сұрақ қойсақ та жылы жымиып тоқтаусыз жауап береді. Өз жұмысын сүйіп істейтін басшы осындай болса керек. Тәуелсіз елдің бақытты балдырғандарына тәрбие мен білім беріп отырған бөбекжай ұжымының жетістіктері көп. 2016 және 2018 жылдардың қорытындысы бойынша «Ұйымшыл ұжым» атанса, жыл сайын ауыл әкімінің алғыс хатымен марапатталады. Күннен-күнге жаңарып, ауылға көрік беріп отырған құтты мекеннің қызметкерлері де жүздерінен шуақ шашқан мейірімді жандар. Ал ата-ананың пікірінше, «Балбөбек» бөбекжайы – балалардың саялы мекені, бақытты бөбектердің ордасы. Ынтымағы жарасқан, көңілдері балаша тасыған, өз мамандығын сүйетін ұжымда тәрбие алған бүлдіршіннен ұлтын сүйіп, ел ертеңін ойлайтын нар тұлғалар шығары анық.
Ардақ СӘКЕНҚЫЗЫ
