"Ханшайым-2" балабақшасы ашылды

Елбасы 2020 жылы бүлдіршіндерді мектепке дейінгі білім беру мекемесімен қамту деңгейін 100 процентке жеткізуді тапсырды. Осыған орай қазір мемлекет пен жекеменшік әріптестік аясында ауданда көптеген балабақша ашылуда. Яғни кәсіпкерлер мемлекет берген мүмкіндікті құр жібермей, «Балапан» бағдарламасы негізінде ел игілігі үшін қызмет етуде. Соның бірі – «Ханшайым-2» балабақшасы.

Жақында аталған балабақшаның ашылу салтанаты өтті. Аудан әкімінің орынбасары Жарқын Омаров арнайы келіп, ізгі тілекпен лентасын қиды. Ата салтымызды берік ұстанатын әжелеріміз бұл қуанышқа арнап шашу шашса, балабақша тәрбиеленушісі Кәусардың атасы Қуантай ақсақал ақ батасын берді. Одан әрі Жарқын Тұрмаханұлы мекеме бөлмелерін аралап, жабдықталуы мен тазалығына оң бағасын берді.

Бүлдіршіндерге есігін айқара ашқан балабақша заманауи үлгіде жабдықталған. Ғимарат күрделі жөндеуден өткізіліп, соңғы үлгідегі жиһаздармен толықтырылған. Бөлмелері кең, жылы әрі жарық. Есіктен кірген сәттен бастап ертегі әлеміне енгендей боласың. Қызметкерлер өз қолымен жасаған түрлі өнер туындысымен қабырғаны шебер әсемдеген. Ал бала жанының бағбандары әр бүлдіршінге ерекше ықыласпен қарайды. Өз баласындай қамқорлық танытып, құшағына алғаны жақсы әсер қалдырды. Ана ретінде бұл көрініс менің де жаныма жылулық ұялатты. Салтанатты шара әрі қарай мерекелік концертпен жалғасты. Концертке аудан әкімінің орынбасары, ата-аналар, тәрбиеленушілер, мекеме қызметкерлері қатысты. Алғашқы сөзді Жарқын Омаров алып, бүгінгі ерекше күнмен құттықтап, балабақша жұмысына сәттілік тіледі. Бүлдіршіннің бал тілімен әсем ән айтылып, өрендер мерекеге жыр шумақтарын арнады. Балғындар заманауи үлгіде көркем би де дайындаған. Немересінің алғашқы баспалдағына келіп отырған әжелер балабақша ұжымына ата-аналар атынан алғыс айтып, ризашылығын білдірді.

Осы мекеменің ашылуына себепкер болған құрылтайшылар – Қазалы қаласының тұрғындары ерлі-зайыпты Берекетовтер жанұясы. Осыдан 5 жыл бұрын Қазалыда 90 орындық «Ханшайым» жеке балабақшасын ашып, халық игілігіне қызмет етіп жүрген отбасыға аудан әкімдігі қолдау білдіріп, қазіргі таңда кент орталығында «Ханшайым-2» балабақшасы қазан айынан бастап өз жұмысын жүргізуде. Қорытынды сөз құрылтайшы Шынаркүл Қуанышқызы мен балабақша меңгерушісі Әсемкүл Бегалиеваға берілді. Құрылтайшы аудан әкімдігіне қолдау білдіргені үшін алғысын айтса, меңгеруші жұмыс барысымен таныстырып өтті.

– Тәрбиенің негізгі іргетасы – балабақша. Бүгінгі ұрпақ – ертеңгі болашағымыз. Келешегіміз кемел болуы үшін бүгіннен бастап еңбектену қажет. Бұл жерде бүлдіршіннің сапалы білім нәрімен сусындауына мүмкіндік мол. Себебі білікті педагогтар балғындарға тағылымды тәліммен қатар, орыс, ағылшын тілдерін де үйретеді. Мекемеде үш топта 66 бүлдіршін тәлім алса, 23 қызметкер жұмыспен қамтылған. Балабақшаның басты ерекшелігі – логопед-дефектолог мамандары жұмыс істеуі. Оған қоса тасымал қызметі де бар, – дейді балабақша меңгерушісі.

Сонымен қатар кішкентайлардың денсаулығы – басты назарда екенін атап өтті. Дәрігерлер бөбектерді күн сайын тексеріп отырады. Ал аспаздар тағамды бар мейірімімен дайындап, құрамына дәруменге толы өнімді қолданатынын тілге тиек етті.

– Бала – өмірдің гүлі, біздің болашағымыз. Сондықтан да тәуелсіздіктің тұтқасын берік ұстап, ел ертеңін ойлайтын саналы, отансүйгіш ұрпақ тәрбиелеу бағытында әрі қарай да еңбек етуге әзірміз, – дейді әдіскер Гүлмира Кенбаева.

Бала тәрбиесіне ерекше мән беретін ата-аналар бұл балабақшада білімдар әрі саналы ұрпақ өсіп шығатынына сенімді. Мұндай ұрпақ – ұлтымыздың баға жетпес қазынасы.