Шекара қызметкерімен кездесті

ЖОСАЛЫ, 10 ақпан – qarmaqshy-tany.kz Жастарды еліне деген сүйіспеншілікке, Отан алдында адал қызмет атқаруға, қорғауға, азаматтық қасиетке баулуда патриоттық тәрбиенің алатын орны ерекше. Әскери қызмет адамзат ғұмырының ерекше және аса маңызды бөлшегі. Елін сүю, Отанын қорғау қашан да ер жігіттің парызы. Отан алдындағы әскери борышын өтеу – ол мақтаныш, жоғары абыройлы өлшем. Қазіргі жастар – егемен елдің тірегі екені айдан анық. Олардың әскери мамандықтарға қызығушылығын арттыру және бағыт бағдар беру бүгінгінің міндеті.

 Агроколледжде өткен кездесу осы бағытта насихатталды. Онда студенттер Қармақшы ауданы қорғаныс істері жөніндегі бөлім бастығы, капитан Рүстем Тұрғанов, ҚР Ұлттық Қауіпсіздік комитетінің шекара қызметінің өкілі, капитан Әлібек Сембаев және теолог маман Жалғасбек Сқақовпен кездесті. Кездесудің мақсаты – жастарды патриотизмге тәрбиелеу, әскери оқуға шақыру, Отан алдындағы міндетін сезіндіру.

   Бүгінде әскерге баруға құлықсыз танытып жүрген жастардың қатары көбеюде. Түрлі себеп айтып, Отан алдындағы парызынан алшақтауда. Олардың дені әлеуметтік жағдайы мен жұмыссыздықты алға тартады. Тіпті кей жағдайда ата-ана баласын әскерге жібергісі келмейтінін ашық айтады.

   Студенттермен кездесуде олардың ой-пікірін білу үшін келген қонақтар еркін форматта әңгіме жүргізді. Алғашқы сауалдарын қойып қазіргі жастардың психологиясын байқады. Десе де әскер қатарына барғысы келетіндер де жоқ емес. Кейбірі өздерінің қай жаққа барғысы келетінін де жасырмады.

   Дөңгелек үстелде жастардың патриотизімге баулу мақсатында түсірілген слайдтар көрсетілді. Онда Ұлттық Қауіпсіздік комитетінің шекара қызметінің өкілі Әлібек Сарыбайұлы Шым қаладағы әскери оқудың жай-күйімен таныстырып, бітіруші студенттерді оқуға шақырды. Ал дін өкілі Жалғасбек Сқақов, жастарға имани тұрғыдағы тәлімді насихатын жеткізді.