Шырша шамы жағылды(фоторепортаж)

Кеше ауданның орталық алаңында жаңа жылдық шырша шамы жағылды. Мерекелік шараны тамашалауға кент тұрғындары көптеп жиналды. Жиында аудан әкімі Мұса Қалдарбеков сөз сөйлеп, кент тұрғындарын мерекемен құттықтады.

– Биылғы жыл аудан үшін шын мәнінде бірлік пен берекенің, жаңа жетістіктер мен мүмкіндіктердің, ел тілегі жүзеге асқан, серпінді жобалардың орындалуымен аса құнды жыл болды. Сонымен бірге Қазақстан Республикасының Тұңғыш Президенті Елбасы Н.Ә.Назарбаевтың бастамасымен биылғы жыл «Жастар жылы» болып жарияланып, ауданның жастары республика бойынша үздіктер қатарынан көрінді, – деді аудан әкімі.

Шара барысында «Қазақстан халық жинақ Банкі» акционерлік қоғамы Байқоңыр филиалы директорының орынбасары Алмат Қайратұлы Қорабаев аудан тұрғындарын келе жатырған жаңа жылмен құттықтап, Газель маркалы инвотакси автокөлігінің кілтін Қармақшы аудандық жұмыспен қамту, әлеуметтік бағдарламалар және азаматтық хал актілерінің тіркеу бөлімінің басшысы Зере Қорғанбекқызы Метероваға табыстады.

Мерекелік шара соңы аудан өнерпаздарының арнайы дайындаған концерттік бағдарламаға жалғасты.