Қармақшы аудандық сотында «Сот жүйесі мен заңнаманы реформалау негіздерін түсіндіру» тақырыбында дөңгелек үстел өтті. Жиынға сот төрағасы Д.Кентбаев, аудан прокурорының орынбасары Қ.Ашимов, ішкі істер бөлімінің өкілі Қ.Буранов, аудандық заң консультациясының адвокаты Г.Қадырбаева, нотариус А.Тойланов, медиатор Ө.Өміртаевтар қатысты.

   Бүгінде өзінің бағытын нақты ұстанған сот жүйесі жылдар керуенін артқа тастап, жүргізілген тегеурінді сот реформасының аясында биік асуларды бағындыруда. Отырыста сөз алған төраға «Сот төрелігінің жеті түйіні» жобасын атап өтті. Олар «Әділдік», «Жауаптылық пен Тәуелсіздік», «Сот төрелігінің тиімділігі», «Әкімшілік юстиция», «Тергеу судьялары», «Судьялардың құзыреттілігі» және «Цифрландыру». Аталған жобаның әрқайсысы үшін стратегиялық және тактикалық мақсаттар белгіленген.

    – Жобанын басты мақсаты – халықтың сот төрелігіне деген сенімін арттыру және заң үстемдігін қамтамасыз ету, – деді сот төрағасы Д.Кентбаев.

    Шара барысында «Сот жүйесі мен заңнаманы реформалау негіздерін түсіндіру» тақырыбында соттың жетекші маманы Телжан Әмірдің баяндамасы тыңдалды. Баяндамада сот жүйесіне енгізілген жаңа ақпараттық технологиялар жайында, сот отырысында аудио-бейнежазба құралдарының қолданылатынын, барлық сот отырысы залының аудио-бейнежазба құралдарымен қамтылғандығы хабарланды. Жаңа ақпараттық технологияларды қолдану сот ісін жеңілдетуге, уақыт пен қаржыны үнемдеуге мүмкіндік бергенін, азаматтар мен заңды тұлғалардың сот жүйесіне қол жетімділігінің артуына мүмкіндік беретінін атап өтті.

Жиын соңында қатысушылар өзара пікір алмасып, сот тарапынан жүргізіліп жатқан жаңашылдықтарға ризашылығын білдірді.