Басылымға түгел жазылған ұжым

– Бізде баспасөз айлығында газетке жазылуда аса бір мәселе тумайды. Оның ішінде «Қармақшы таңына» жазылыңдар» деп жар салудың қажеті шамалы. Қалтаға ауыр тимесін дейміз ғой. Республикалық, облыстық басылымдармен алмастырып, бөліп жазғанбыз. Соңында «аудандық газет керек еді» деп өтініш білдірген көп болды. Сондықтан таңдауды оқырман еркіне саламыз. Елдегі, облыс, аудандағы жаңалықты алдымен ұстаздар қауымы білуі керек. Өйткені олар білгенін балаға айтады. Мектеп ұстаздары білімі мен білігі жағынан ешкімнен кем түспейді. Қоғамдық жұмыстан да тысқары қалып жатқан жоқ. Зерделеп қарасам ұжым мүшелері әр нөмір келген кезде газетке шыққан мақаланы мұғалімдер кеңсесінде талдап отырады. Соны көргенде жаңалыққа жаны құмар, кітап, газет оқып, ізденетін ұстаздар көп деп қуанамын. Газет – рухани құрал ғой, ақыл-кеңес берер досың, – дейді мектеп директоры Бауыржан Назарұлы.

Тіршілік атаулы күн шуағынан, жер-судан нәр алса, адамзат баласы оқып-білуден рухани азық алады. Көп оқыған адам көп біледі. Кез келген ортада өзін еркін сезініп, түрлі тақырып төңірегіндегі сөзге араласып, пікірін білдіреді. Мектеп мұғалімдері белсенділігімен ерекшеленеді. Бәлки бұл – жиі кітап пен газет-жорнал оқығаннан болар. Қазір білім ордасында 508 оқушы білім алуда. Ұстаздың да, шәкірттің де алған асуы мен шыққан белесі аз емес.

– Биыл мектеп «Жетістігі мол білім ордасы» деген атпен «BIRINSHI» республикалық латын тіліндегі энциклопедияға енді. Облыстық «Алтын қазына» байқауында тоқыма бұйымдарын дайындау номинациясы бойынша он саусағынан өнер тамған оқушымыз Еркеназ Тасболатова ІІІ орын иеленсе, республикалық балалар мен жасөспірімдердің қолөнер көрмесінде Алма Сақташева Гран при ұтып алды. «Жарқын болашақ» республикалық олимпиадасының облыстық кезеңінде жазушылар номинациясы бойынша Сымбат Ұзақбаева І орын, Ү.Қошалақов атындағы аудандық ХІІ пәндік олимпиадада Мұратбек Оразбаев ІІІ орын, «Өзін-өзі тану пәні бойынша» дәстүрлі «Ізгілік – өмір нәрі» атты әлеуметтік жобалар фестивалінің І облыстық кезеңінде Гүлдана Базарбаева ІІІ орын алып, ауданның абыройын өсірді. Әрине бұл шығармашыл ұстаздардың жұмысының нәтижесі, – дейді директордың оқу ісі жөніндегі орынбасары Майра Тұрғанова.

Шынында да, жан сарайы құлықсыз, жаңалықтан алыс маманның алысқа шаппасы анық.

– Сондықтан газетке алдымен мұғалім жазылуы тиіс. Әріптесті туған өңірдің төл газеті – "Қармақшы таңын" үзбей оқуға шақырамыз, – дейді жетістігі мол білім ордасындағылар.