Жаһанды жайлаған коронавирус індеті елімізде белең алып жатқан тұста екі қолын бос қойып жайбарақат отырған жас болмаған шығар, сірә?! Елім деп езіліп, жұртым деп жұмыла қызмет еткен еріктілердің нағыз ерлігі осы тұста байқалды. Еріктілік – халқымыздың шынайы болмысы.

Мемлекет басшысы Қасым-Жомарт Тоқаевтың 1 қыркүйектегі «Жаңа жағдайдағы Қазақстан: іс-қимыл кезеңі» атты Қазақстан халқына жолдаған Жолдауында індетпен күресте түрлі сала мамандары мен еріктілердің ерлігін ерекше атап өтіп, табандылық пен зор жауапкершіліктің жарқын үлгісін көрсеткендері үшін өзінің шынайы алғысын білдірді. Еңбекті елеген Президенттен алған алғыс біз үшін үлкен мәртебе.

«Nur Otan» партиясының төрағасы Нұрсұлтан Назарбаевтың бастамасымен төтенше жағдай мен карантин режимінде миллиондаған адамға азық-түлік пен тұрмыстық заттар себеттері таратылды. Игі істер жолында «Jas Otan» жастар қанатының белсенділері мен көшбасшылары аянбай еңбек етті. Өздеріне төніп тұрған қауіпке қарамастан бастарын бәйгеге тікті. Мұны Мемлекет басшысы Отанға деген шынайы сүйіспеншіліктің жарқын көрінісі деп санады.

Мемлекет басшысы өз сөзінің бірінде қоғам мүшелерінің тез әрі оңай жолмен байып кеткісі келетінін ашып айтты. Әлбетте, мен Президенттің бұл ойымен толығымен келісемін. Замандастарым, қатарластарым мемлекеттің оларға беріп жатқан көптеген мүмкіндіктерін зая кетіріп жатыр. Бәсекеге қабілетті жастарды даярлау үшін көптеген шаралар жүргізілуде. Сол шараларды жастар арасында кеңінен насихаттау біздің мойнымызда.

Алдымызда үлкен міндеттер тұр. Ендігі кезекте тұлғалық дамуымызды жетілдіруге тиіспіз. Мемлекет басшысының Жолдауы жастар арасында зор қолдауға ие болды. Болашақта қабылданған шаралар мен түйткілікті мәселелер өзінің оңтайлы шешімін табады деген ойдамыз.