Жақында Президент Қасым-Жомарт Тоқаевтың «Жаңа жағдайдағы Қазақстан: іс-қимыл кезеңі» атты Қазақстан халқына Жолдауын жолдады. Ол елдің дағдарыстан кейінгі дамуының негізгі мақсаттарын айтып, Жолдаудың едәуір бөлігін экономикалық және әлеуметтік мәселелерге арнады. Мемлекет Президенті елдегі коронавирустың қазіргі жағдайы туралы баяндап, адам өмірі мен денсаулығының маңыздылығы жолында алдағы уақытта жаңа шаралар қабылдайтынын жеткізді. Сондай-ақ мемлекет тарапынан дағдарыстан шығу үшін арнайы қаражат бөліп, бұрынғы жағдайды қалпына келтіруге ықпал ететінін, пандемиямен күрес жөнінде кешенді бағдарлама әзірленетінін хабарлады. Мемлекет тарапынан әлеуметтік саладағы және экономиканы қолдауға бағытталған барлық міндеттемелер орындалатыны барша қазақстандықтардың көңіліне сенім ұялатты.

Ең бастысы, Мемлекет басшысы Қазақстан халқына Жолдауында экономикалық дамудың жаңа бағыттары мен ауылшаруашылығын дамыту мақсатында шұғыл шара қабылдау қажет екеніне ерекше көңіл бөлді. Сонымен қатар, байтақ жеріміздің сатылмайтыны тағы бір жақсы жаңалық деп білемін. Өйткені ата-баба аманат еткен байтақ жер – біздің құнды мұрамыз. Бұл Жолдаудан көпшілік көкейіндегі сұрағына жауап алып, алдағы нақты мақсат пен жүрер бағытты айқындады. Ендігі кезекте берілген тапсырмалар орындалып, халықтың әл-ауқатының жақсаруына сенім мол.